Famia i partidario di Helmin Wiels a protestá na Wilhelminaplein, pasobra ainda no a sentensiá e perpetradónan intelektual – potrèt: Anneke Polak
WILLEMSTAD – Ministerio Públiko ta bai wak si por trasladá Elvis ‘Monster’ Kuwas, esun ku a tira den e asesinato di e polítiko Helmin Wiels, pa e prizòn SSDK na Kòrsou.
Den apelashon korte a husga ku kastigu di bida largu ta un bon kastigu. Te awor Kuwas ta sinta e sentensia aki den un prizòn na Hulanda despues ku a traslad’é pa motibunan di seguridat. “Ministerio Públiko ta enkargá ku ehekushon di e detenshon. Ainda mester tuma e desishon unda ta sinta e kastigu, pero nada no ta stroba nos di lag’é sinta su kastigu aki na Kòrsou”, bosero Norman Serphos ta bisa mésora despues di e sentensia den apelashon.
Dick Drayer den kòmbersashon ku Norman Serphos, Betty da Fonte i Aubert Wiels
Apsolushon
No tin un término pa OM disidí tokante di esaki. Promé ku dos siman pasa OM mester bisa sí, si lo rekurí na kasashon kontra e apsolushon di Dangelo Damascus i Carlos Pieter. OM ta akusá nan dos di komplisidat na e asesinato riba Wiels ku e servisionan ku nan a duna, pero wesnan di korte den apelashon tambe a husga ku no a prueba esaki sufisientemente.
Carlos Pieter ta sali korte despues di e sentensia – potrèt: Dick Drayer
E famianan i partidarionan di Helmin Wiels, ku tabata protestá ku bòrchi na Wilhelminaplein, tabata emoshonal despues di e sentensia. Nan ta haña ku ta dura largu promé ku kaba di solushoná e kaso kompletamente. Serphos ta enfatisá ku OM no ta laga e tipo di demonstrashon aki ansha nan. “Kaso Magnus tabata un periodo largu i intensivo, ku a tuma hopi tempu. Ma nos no ta kla ainda, mester detené e perpetradónan intelektual i laga nan parse dilanti wes. Esaki ta eksihí preparashon i investigashon drechi.”
Komprenshon
E echo ku esun ku a tira ta será tampoko no ta muchu konsuelo pa e demonstradónan. Wesnan di korte tampoko no a kere nada di e palabranan di Monster durante e seshon di apelashon fin di yanüari, ku el a tene kuenta ku sintimentunan di e famianan. Wes Ter Berg: “Su deklarashon no parse niun tiki outéntiko. Korte no a por a deskubrí ni un momentu ku e sospechoso a kuminsá haña komprenshon di su mes.
Te ainda no ta kla ki dia e kaso Maximus, di e perpetradónan intelektual tras di e asesinato di Wiels, lo kuminsá.
Outor Anneke Polak