Porkonan di Kòrsou detektá ku dioxina | potrét: José Manuel Dias
WILLEMSTAD – Apesar ku e kantidat di dioxina den karni di porko produsí lokalmente a keda mesun haltu, esaki no ta forma un peliger pa salú di hende. Esaki ta e konkluhon ku Departamentu di Asuntunan Veterinario a yega na dje despues di a laga hasi un evaluashon di riesgo.
E evaluashon di riesgo a duna komo resultado ku e nivel di dioxina detektá ta relativamente abou i ku esaki no tin influensha negativo riba salú di konsumidónan di karni di porko. Hefe di departamentu, Arnold Dwarkasing, ta enfatisá ku e analísis di riesgo ta basá riba konsumo normal di karni di porko bou di kondishonnan normal. Konforme e resultado aki a disidí ku ta kanselá e medida pa soya porko despues di sakrifisio. Tambe a stòp di kùr af higra i nir di porkonan lokal.
Un reportahe di José Manuel Dias
Pa loke ta e medidanan den direkshon di e kriadónan di porko a keda disidí ku ta mantené esakinan i ta duna e kriadónan di porko seis luna èkstra pa por kumpli ku tur e eksigensianan. Konforme un desishon anterior e medidanan aki lo mester a keda implementá promé ku dia 8 di febrüari último.
Medidanan
E medidanan ta enserá ku mester stòp di duna porkonan kuminda den tera, nan mester kome riba betòn of den baki. Tambe mester kuminsá duna e porkonan layena di kome i stòp ku dunamentu di restu di kuminda prosedente di ‘landfill’ i por ultimo mester stòp di kima sushi riba tereno kaminda ta kria bestia.
E kriadónan di porko a bisa di ta dispuesto pa hasi e kambionan nesesario basta ku gobiernu yuda kubri parti di e gastunan. E problema di mas grandi ku e kriadónan di porko ta konfrontá ta e preis haltu di kuminda pa porko. Segun e registro di Departamentu di Asuntunan Veterinario, aktualmente Kòrsou ta konta ku mas o menos setenta kriadó di porko.
Outor José Manuel Dias