More Mata (PDB) | foto Belkis Osepa
KRALENDIJK – Dos kandidato Boneriano remarkabel pa nan edat ta riba lista di dos partido polítiko ku lo partisipá na elekshon di Konseho Insular dia 18 di mart benidero. Tantu Miosotis ‘More’ Mata (17 aña) komo Ambrocio ‘Cola’ Sint Jago (82 aña) ta kompetí pa haña voto di nan apoyo polítiko p’asina laga nan bos resoná den polítika.
Na Boneiru shete partido polítiko ta partisipá na elekshon di Konseho Insular. Votadónan tin oportunidat pa vota pa un total di 141 kandidato. Tin nuebe asiento disponibel den Konseho Insular.
Belkis Osepa den kombersashon ku More Mata i Cola Sint Jago
Eksigensha
More Mata huntu ku un otro kandidato (Ulda Pinedo) ta e kandidatonan di mas yòn den istoria boneriano. More Mata ta number 18 riba lista di Partido Demokrátiko Boneriano (PDB). Segun lèi elektoral hulandes – ku ta konta awor tambe pa Boneiru, Saba i Statia – ku nan 17 aña, nan por ta riba lista di un partido. Pero no por elihí nan pa drenta Konseho Insular. Un di e eksigenshanan pa bira miembro di Konseho Insular ta ku bo mester tin 18 aña.
More Mata ta spera ku pa e próksimo elekshon aki kuater aña sí e por lucha pa un dje asientonan den e konseho. “Ta mi oportunidat pa trese e bos di hóbennan dilanti i eksprenshá polítika pa promé bes.”
Rekreashon
E tin algun tereno importante pa enfoká ariba durante su kampaña polítiko. Entre otro e desaroyo di talento di hóbennan i e falta di rekreashon. Mata ta sinti falta di un teater, sine i fiestanan adekuá pa hóbennan. E falta aki ta pone ku tin hóben por kohe kaminda robes pasobra nan no tin nada di hasi.
Un otro tópiko ku More Mata a analisá profundo ta e uso di idioma na skol. E ta boga pa dosentenan hulandes tambe siña Papiamentu. “Mi ta haña ku dosentenan tambe mester komprondé nos lenga pa nos por komuniká mas mihó ku otro. Tresten nos ta sigui traha riba nos nivel di hulandes. Si nos bai Hulanda nos tin di adaptá nos mes aya. Pues aki tambe mi ta spera meskos.”
Cola Sint Jago | foto Belkis Osepa
Cola Sint Jago
Cola Sint Jago ta penshonado i ta move ku su 82 aña poko mas trankil. E ta number 32 riba lista di e partido nobo Movementu di Pueblo Boneriano (MPB). “Mi a nase na aña 1932. Pesei mi a haña e number 32”, asina Sint Jago ta bisa hariendo. Anke Cola Sint Jago a simpatisá den pasado ku diferente partido, ta pa promé bes ku el a subi lista di un partido.
Sint Jago ta sinti i wak e doló ku penshonadonan tin. E ta vosiferá e loke penshonadonan ta pasa aden. “E doló di mas grandi ta e falta di sufisiente sèn. Penshonadonan mester algu mas riba loke nan ta haña.”
Pa loke ta trata e relashon ku Hulanda Sint Jago ta bisa ku e trato mester bira aún mas mihó. “Awor ku Boneiru a bira hulandes, mi por bisa ku Hulanda a tuma tres yu (Boneiru, Saba i Statia) den su kas. Hulanda ta nos mama i tata. I mester trata su yunan bon pa nos por biba dushi.”
Outor Belkis Osepa