OM BES ta apelá | potrèt Belkis Osepa

OM BES ta apelá | potrèt Belkis Osepa

KRALENDIJK – E sospechoso mayó den e asesinato dòbel Country Garden, Rayan Frans, djárason meinta ora hulandes ta sali liber. Fiskal mayó Henry Hambeukers ta bisa ku e ora ei mésora Frans ta haña un teket i e por biaha pa Boneiru.

Den e kaso Country Garden kaminda a asesiná dos víktima, e siman ku a kaba dos hòmber kada unu a haña 24 aña di kastigu den sèl. Kuater otro sospechoso segun e eksigensha di Ministerio Públiko (OM) a sali liber.

Interes
Wes Irma Lips durante un seshon di raadkamer awe meinta a indiká ku e interesnan personal di Rayan Frans ta pisa mas ku e interesnan pa ten’é mas largu. Hambeukers: “Ounke e ta keda sospechoso i ounke tin opheshon serio kontra dje, lo skòrs e ehekushon di su detenshon preventivo bou di sierto kondishon. “ E no tin mag di kometé aktonan kastigabel i e no por tin kontakto ku testigu i famianan di e víktimanan.

OM a sinti e kos aki bini kaba djabièrnè último ora wes Irma Lips durante e veredikto a deklará ku ta e dos hòmbernan ku a haña 24 aña so tabata presente durante e asesinatonan. Segun Lips no tabatin kuestion di asesinato premeditá tampoko. OM a apelá esaki.

“Nos no a ferwagt ku un desishon den e kaso kontra un otro sospechoso ta reflehá riba e kaso kontra e sospechoso mayó.”, Hambeukers ta bisa. “Durante e raadkamer nos a haña oportunidat pa splika ta kiko tabata su ròl. Nos tin prueba ku ta konekt’é na e asesinatonan. Korte tambe ta haña ku ainda tin opheshon serio kontra e sospechoso mayó.

Kondishonnan
Segun Hambeukers por ta pa motibu di e periodo ku e ta sera preventivamente. A detené Rayan Frans aña pasá dia 8 di mart. E seshon pro forma den e kaso di Rayan Frans ta sigui dia 3 di yüni. Den relashon ku seguridat a pone polis na altura i huntu ku OM nan ta supervisá e kondishonnan pa lag’é sali liber.

Outor Belkis Osepa