Mester ehekutá e oumentonan segun rèktòr magnífiko Francis de Lanoy, pasobra e universidat tin debe. Potrèt: Elisa Koek
WILLEMSTAD – “E aña aki mi ta sali nèt nèt ma mi no ta sobra nada”, studiante di Lofo Urvina Pieters-Janzen ta konta. Na yüli di 2014 a disidí di subi e plaka di kolegio di studiantenan na University of Curaçao (UoC) ku mil florin pa edukashon di bachelor i dos mil florin pa edukashhon di master. Awor a bin sali ku e mesun oumento ta na vigor atrobe pa e aña di skol binidero di 2015-2016.
Julio Abraham, studiante di lei, a tene un enkuesta bou di studiantenan. 62 porshento di e studiantenan a indiká ku nan no por a paga e plaka di kolegio di 2014-2015. I 33 porshento tabata por ku hopi trabou.
Stephanie Ballantyne Gumbs ta den su di dos aña di e estudio Business & Economics. Pa su estudio el a kalkulá kon grandi su debe serka Stichting Studiefinanciering Curaçao (SSC) lo sali. Pero e kalkukashon aki ta faya kompletamente. “Mi mayornan no ta gana sufisiente pa yuda mi i mi ta traha parttime kaba ke men mas mi no por hasi. Mi no ke stòp di studia pasobra e ora ei mi tin un debe si serka SSC anto mi no tin diploma.”
Arantza Jansen ta studia Human Resources i e ta den su di tres aña. Promé ku el a kuminsá na UoC e tabata duda si e bai studia na Colombia. E tin duele di e loke el a skohe. “Pa bisa frankamente si ta awor mi a kaba skol lo m’a bai Colombia. Pa studiante nobo UoC apsolutamente no ta atraktivo, pero aworaki mi no por tira tres aña afo djis numa. Mare mi tabata sa esaki promé.”
No akseptabel
Mester ehekutá e oumentonan segun rèktòr magnífiko Francis de Lanoy, pasobra e universidat tin debe. “Nos mester mustra kreditornan ku nos ke paga nos debenan. Ademas nos ke mehorá sierto asuntu na UoC.” Pa hopi studiante e splikashon aki no ta akseptabel: nan ta rabiá ku nan ta bira víktima di debe ku a inkurí prome ku nan tempu.
Tin studiante ku a protestá i ekspresá nan prekupashon, pero esaki no a yuda mashá. Atrobe a oumentá e plaka di kolegio. “Niun hende no ta interesá”, Marie Jansen, studiante di Lofo ta bisa. “Tin otro manera tambe pa ekonomisá, pero nan no ta ni wak esakinan. Na final kada bé tin ménos studiante ta sigui un estudio nan UoC i asina no por paga e debe ei nunka mas.”
Dos luna sin plaka
Algun studiante tabatin un prekupashon èkstra e último lunanan. Studiante ku problema finansiero, banda di SSC ta risibí finansamentu di gobièrnu tambe. A keda sin transferí e kontribushonnan aki dos luna largu. E siman aki a depositá esaki, pero Pietersz-Janzen a pasa den strès. “Mi mester di e plaka aki”, e ta bisa. “Mi tin dos yu anto di repente mi tabata falta un parti di mi entrada.” Segun Suzette Cijntje di SSC nan ta pèrkurá pa tur pago semper ta na tempu i esaki di bèrdat tabata falta di gobièrnu. “Kada dia 15 di luna ta depositá e plaka, nos sa ku e studiantenan ta dependé di nos.”
Pietersz-Janzen ta kontentu ku e tin e plaka awor pa e por konsentrá riba e èksamennan binidero. Ta difísil pa mantené su atenshon kompletamente riba esaki. “Mi mester fókùs riba mi tèntamennan ma mi mester wak tambe kon mi ta bai sali ku mi sèn otro aña ku speransa ku nan no ta subi e plaka di kolegio atrobe. Sino si a kaba pa mi.”
Outor Elisa Koek