Klínika Capriles | Potrét: Leoni Leidel- Schenk
WILLEMSTAD – Despues di un proseso di kasi dos aña, Fundashon Kuido di Ambulans, dòkternan di kas, klínika Capriles, Kuerpo Polisial, PSI Skuchami, i St. Elisabeth Hospital, finalmente a yega na un akuerdo: luna pasá a bira vigente un protokòl sikiátriko mandatorio.
Señora Rita D. i su famia sigur ta kontentu ku e protokòl akí, paso esaki ta nifiká un mihó kordinashon entre famianan i e partnernan. Famia D. ta biba ku e realidat akí tur día, paso nan yu hòmber aktualmente ta interná na klínika Capriles. “Na aña 2000, mi yu homber más yòn a haña un episodio, kual tabata nos promé eksperensia ku kuido sikiátriko”, el a splika. “Mi kasá mes a hiba mi yu su dókter di kas, kende a firma e sertifikashon médiko, unda por a interná e yu pa un estadía kòrtiku”, el a kontinúa. Aki a diagnostiká su yu komo skitsofréniko paranóiko, kual hopi biaha ta bira vigente ora e persona ta entre 18 pa 35 aña.
Banda di problemanan sikiátriko, yu hòmber di Rita D. tambe tin problema ku adikshon, kual ta hasi su estado mental más pió. Na aña 2001, e yu a kometé un krímen i e tabata enkarselá pa varios aña. Después ku e yu a rekobrá su libertat a surgí un periodo hopi difísil pa e famia.
Durante di un periodo di kasi un aña i mei, Rita D. i su famia mester a yama polis sigur dies bia pa insidentenan na su kas. “Na un sierto momento, polis no kièr a ni bini nos adrès más”, Rita D a splika. Finalmente famia D. a logra ku korte a intervení i pone nan yu bou di tutela di estado unda e por haña e tratamentu nesesario.
Na promé lugá ta e famia ta responsabel pa nan familiar ku ta un pashènt sikiátriko, Imro Zwerwer, inspektor ‘Head Unit Intake & Service’ di Kuerpo Polisial Kòrsou a splika. “Den kaso ku ta trata un situashon kaminda ta tacha órden públiko of tin menasa pa bida di hende of ta na un sitio públiko, e ora ei, e responsabilidat ta pa polis i esei por ta 24/7”, el a splika.
E meta di e protokòl ta pa e proseso di internashon mandatorio, kual ta ankrá den e ‘Landsverordening voor Verpleging van Psychiatrische Patienten’, kana mas fleksíbel. Klínika Capriles ta atmití pashènt ku ta un peliger pa nan mes i nan ambiente, según Waldi Oostburg, direktor médiko di klínika Capriles.
Protokòl sikiátriko:
Entre 7:30 di mainta pa 4’or di atardi, polis ta e promé punto di kontakto. Aki polis ta determiná si e suidadano mester di kuido sikiatriko i ta yena un dekreto. Después di oranan di ofisina, durante di wikènt i dianan di fiesta, ta hiba e suidadano EHBO na St. Elizabeth Hospital unda e evaluashon médiko ta tuma lugá.
Según e prosedura regular, polis ta hiba e suidadano PSI Skuchami, unda un dokter ta bin evaluá e situashon i finalmente ta determiná si e suidadano mester di kuido sikiátriko. Aki ta otorgá un sertifikado médiko, pa transportá e suidadano ku ambulans i eskortá pa polis pa Klínika Capriles. Na su yegada, e sikiater na warda ta evaluá e persona i ta determiná si e mester di tratamentu agudo i si e mester keda interná. “N’e momento ei e suidadano ta bira un pashènt obligatorio pa un periodo di seis siman”, e direktor médiko a kontinuá. Finalmente tin un tribunal na klínika Capriles, unda un hues ta determiná ku por laga e pashent den libertat of mester ekstendé su tratamentu.
Mester atendé situashonnan sikiátriko lihé i ta prioridat number dos pa kuerpo polisial. “Esei ke men ku mester respondé den 20 minüt”, Zwerwer a splika. E opstákulo más grandi ta falta di rekurso humano. “Tampoko no a train kuerpo polisial pa trata ku pashèntnan sikiátriko, i mi ta rekonosé ku esaki mester bini urgentemente”, Zwerwer a añadí. Lo evaluá e protokòl akí tres luna.
Outor: Deya Mensche