Etienne Ys – potrèt: Dulce Koopman
WILLEMSTAD – E entusiasmo pa e proyekto di guia pa ‘rekenen’ pa muchanan di skol, di Fundashon Tur ta Konta, ya ta surpasá ekspektativa. Den un tempu rekòrt e Fundashon a haña 80 profeshonal ku ta bon den sifra, pa fungi komo tutor. Nan ta koperá boluntariamente ku e programa pa yuda alumnonan di grupo 6 pa 8 di Skol di Fundeshi komprondé i traha sòm i matemátika. A lanta Fundashon Tur ta Konta na sèptèmber 2014 i na desèmber último e muchanan a kuminsá haňa asistensha.
Eks promé minister, Etienne Ys ta inisiadó di Fundashon Tur ta Konta. E ta splika ku el a haňa e idea pa lanta e fundashon, ora e tabata yuda su yunan ohochi (14) ku hùiswèrk di rekenen. Etienne Ys a realisá ku asistensha individual na muchanan ku mester haña yudansa ku rekenen ta hopi efektivo.Konsiente dje hecho ku banda di su yunan, tin hopi mucha na Kòrsou ku tin mester di e guia aki, a lanta e fundashon.
Etienne Ys den kombersashon ku Dulce Koopman
Direktiva di Skol Katóliko a indiká e skolnan ku aktualmente ta partisipá den e proyekto, i Direktiva di Skol Públiko (DOS) a indiká dos skol, ku e Fundashon lo kuminsá traha kuné e próksimo aña eskolar.
Fundashon Tur ta Konta mes no ta skohe e muchanan. Skol ta informá e Fundashon ta kua ta e muchanan ku ta bin na remarke pa partisipá. E bèilès ta tuma lugá un biaha pa siman den un lokalidat na e skolnan mes. Etienne Ys ta enfatisá ku tur loke ku e fundashon hasi ta tuma lugá den konsulta ku skol i ku e mayornan, E asistensha ta dura un aña eskolar kompleto.
Outor Dulce Koopman