Abogado Chris Lejuez – potrèt: Jackeliene Geeve
ORANJESTAD – E detenidonan femenino den Korrektie Instituut Aruba (KIA) a muda pa nan departamentu nobo. Ku esaki KIA a alkansá e fecha límite ku wes a duna dos siman pasá despues di un bishita na e ‘kouchi di muhé’ ku mal fama.
E sirkunstanshanan den e kaminda di keda anterior tabata forma un menasa pa salú di e detenidonan, asina wes a husga despues di su bishita. P’esei KIA mester a pèrkurá pa den dos siman tin un departamentu renobá. Si no, lo a skòrs por lo ménos un hende muhé di su enkarselashon provishonal.
Propio sèl
Di un espasio ku tabata hole stinki di berpùt, di mas o menos 45 meter kuadrá kaminda e muhénan mester a baña, kome, drumi, i usa tualèt, nan a muda pa un kaminda ku kada unu tin su propio sèl ku un kama i un tualèt. “Un mehorashon’, abogado Chris Lejuez ta konfirmá. “Pero tabata nesesario. Nos no por pèrmití ku detenidonan ta resultá den un situashon inhumano. I nos mester evita sigur ku nos lo bai haña esaki normal.
Televishon
E detenido ku Lejuez ta defend ainda no ta kompletamente satisfecho ku su espasio nobo. Asina e dama ta keha di falta di privasia. Pasobra e sèlnan no tin bentana i for di nan toren di vigilansha e wardaprezunan por lur wak paden. Ademas ainda e kushina no ta kla i no a instalá televishon. Direktor di KIA Trudy Hassel a primintí ku riba término kòrtiku lo atende esaki i ku lo kologá kòrtina dilanti di e bentananan.
Outor Jackeliene Geeve