E pareha El Hage i Ramonsito Booi mas patras despues di e apsolushon
KRALENDIJK – “E trato di e kaso Zambezi den apelashon a fortifiká Korte den e konvikshon ku no tabatin niun sorto di prueba kontra nos klientenan.” Asina abogado Geert-Jan Knoops ta bisa despues di e apsolushon pa èks polítiko Ramonsito Booi i e pareha Burney i Ginia El Hage.
Korte a sentensiá sinku ora despues di e último palabra di e tres sospechosonan. Aña pasa Korte den Promé Instansha a apsolvé Booi i e pareha El Hage kaba. E kaso Zambezi a kuminsá kasi shete aña pasá komo un kaso di korupshon.
Buki pretu
Fundashon Bon Gobernashon a entamá e kaso ku un asina yamá buki pretu. Eiden tabatin un kolekshon di prueba di korupshon bou di polítiko lokal na Boneiru. Djei a pluma e kaso Zambezi.
No a inkluí e korupshon atministrativo den e kaso Zambezi. Ta e echonan di falsifikashon di dokumento i e dunamentu di informashon inkompletu pa un fiansa di hipotek so a sobra den e kaso. E apelashon di kasashon di Ministerio Públiko tokante e echonan di korupshon ainda ta kana na Korte Supremo na Hulanda.
Tantu Knoops komo Booi i e pareha El Hage ta satisfecho. Knoops: “Korte ta reprochá OM ku nan no a bini ku niun argumento pakiko e apsolushonnan anterior lo no tabata hustu. No por ta mas kla ku esaki A persiguí nan sin prueba. Esaki a afektá nan bida pa semper .”
Knoops ta indiká ku su tim ta gradisí korte ku e sentensia a bini awe i no te aki tres siman. E sentensianan ta bini seis dia promé ku elekshonnan lokal pa eilandsraad riba 18 di mart. Booi i El Hage ta korifeo di e partido di gobièrnu di mas grandi UPB.
Outor Belkis Osepa