Crwash van Un Tim Magno om geld in te zamelen | foto Un Tim Magno

Crwash van Un Tim Magno om geld in te zamelen | foto Un Tim Magno

KRALENDIJK –  E sentimentu na Boneiru pa ku elekshon di Konseho Insular dia 18 di mart ta balansá entre speransa ku e isla lo haña mas bienestar despues di elekshon i skèptisismo pa ku polítika. E elekshon aki ta un importante i determinante pa futuro di Boneiru. Tambe por konkluí despues di un kampaña polítiko ferviente ku ta difísil pronostiká resultado dje elekshon.

Shete partido ta partisipá na e kontienda elektoral. Na 2011 e kantidat tabata sinku. Tur shete partido a midi forsa ku otro pa haña e votadó na su banda. Partidonan a hasi ekstensivamente uso di medionan di komunikashon pa pasá seri di programa ku entrevistanan i propaganda pa haña mas tantu voto durante elekshon. E maneranan tradishonal pa gana voto tampoko no a keda atras.  Banda di partimentu di steker, tíshùrt, bandera i otro material di propaganda, tabatin tambe banda i kantantenan popular lokal i for di afó, pa atraé e votadó drenta kura di un partido.

Un kontribushon di Belkis Osepa

Konsiente
E grupo mas grandi di e reim 12 mil persona ku derechi pa vota ta riba 40 aña bai ariba. Castida Marcera ta Dominikana (66) i ta biba 27 aña kaba na Boneiru. Anke ainda na bíspera di elekshon hopi Boneriano ta duda riba kua partido nan vota; Castida Marcera sí sa. “Mi ta hopi konsiente sí riba kua partido mi ta vota. Aña pasá a primintí nos mas penshun, pero el a keda meskos. E gobièrnu nobo mester hasi algu na salario i penshun.”

Eindfeest campagne Democrastische partij | foto PDB

Eindfeest campagne Democrastische partij | foto PDB

Marcera ta un dje poko habitantenan di Boneiru ku ora a puntr’é riba kaya, el a bisa mesora ku e sí ta bai vota. Hopi ku a haña e pregunta ta bisa ku nan ta duda. Tin di nan ta sképtiko i ta bisa ku votamentu ta pèrdèmentu di tempu, pasobra nada lo no kambia. Otro no tin konfiansa mas den polítikonan.

Mentira
Richenel Abrahamsz: “Polítikonan ta hasi kos pa kumbiní nan mes i nan famia. Ora mi tende nan papia na radio mi ta bisa: ata nan ta kumpra hende atrobe pa gaña nan. Nan no ta kumpli ku loke nan primintí pueblo. I esnan ku gana elekshon mes semper lo bisa ku nan no por drecha loke esnan promé a daña. E mentira ei lo keda.” Abrahamsz tin gana pa e gobièrnu nobo dediká atenshon na e sector laboral pa krea mas trabou.

Yufrou Thea Pauletta (69) sí no tin mashá duda. Anke e ta haña ku e metanan di e partidonan ta kasi meskos, loke por pone e votadó konfundí. Tòg e ta bisa ku mester tene kidou ku e gritu pa kambio. “Mi ta bisa ku loke ta bon mester keda kuné i drecha loke no ta bon.” E ta spera ku tur hende hasi uso di nan derechi di vota. “Si bo no hasi uso di dje, kon bo por reklamá despues.”

Finansa
Un otro krítika ku por tende riba kaya ta ku no ta duna splikashon kon ke finansiá tur e plannan ku ta trese dilanti den e programanan di partido. E partidonan no ta duna bista bon kla di e preis di e promesanan. Vladimir Mercera (33): “Bo no sa kua dje partidonan ta konfiabel. Ora un hende pèrdè konfiansa, ta difísil pa bo gar’é bèk. Tin muchu primintimentu i no tin kumplimentu.”

Outor Belkis Osepa