Udemar ‘Shon Ma’ Isidora | Potrèt: Dulce Koopman
WILLEMSTAD- E kriminalidat kresiente na Kòrsou prinsipalmente ta konsekuensha di falta di interkambio di informashon entre instanshanan i di maneho. Esaki ta opinion di èks polis i presidente di bònt di polis, Udemar ‘Shon Ma’ Isidora i Kriminologo i èks minister Stanley Inderson.
E echo ku den un siman tabatin asesinato di tres persona ta krea e sentimentu den komunidat ku Kòrsou ta den un gara di violensha severo. Cristina Hogester-Barry (nase: 8 oktober 1979) a muri den kurá di su kas na Kaya Misa Alegre na Zuid Bonam a konsekuensha di hinkánan ku kuchu, 15 di mart último. Mientrastantu polis a detené su kasá, Arthur Hogesteger (43) komo sospechoso den e kaso di asesinato di e dama i e investigashon ta kontinuá. Djabièrnè a deskubrí Humphrey Hose Martina, ( nase: 19 di mart 1992) i D’angelo Luisa ( nase: 30 novèmber 1998) ku tiru den kabes na Koral Tabak.
Kriminólogo, Stanley Inderson ta atribuí e situashon di kriminalidat aktual na falta di un maneho. Ademas e aktonan violento último añan a oumenta tantu na kantidat komo kalidat.
Den kombersashon ku Dulce Koopman e ta splika.
E asesinatonan aki ta sigui e atrako ku resultado mortal na Zona Franca na Hato 6 di maart ku a kousa morto di trahadó di Servicios Panamericano Zhadiro Zhevenhuizen ( nase: 22 augustus 1978).
Shon Ma Isidora ta insistí ku instanshanan mester fasilitá otro informashon i krea un banko di data, pa por aktua ora ta nesesario. E ta konvensí ku krimen pa basta tempu tin nos pais den su gara, pasobra nada no ta pasa pa frena e kriminalidat. “Nos ta blo ta buska un método pa kaba ku kriminalidat anto nos no ta logra i no ta hasi uso di e kos pa fren’é tampoko”.
Segun e èks polis i lider sindikal, Kuerpo di polis i ministerio publiko ta riba nan mes. No tin koperashon ni tampoko interkambio ku entre otro sektor di enseñansa. E instanshanan mester kuminsá reuní i interkambiá nan datonan. Di e forma aki por planeá kon ta e miho manera pa atendé ku asuntunan na Korsou.
Pa ilustrá e importansha pa kompará informashon, Shon Ma Isidora, a referí na e hecho ku ora ku un prisonero ta bandoná prizòn, instanshanan no ta informá ni tampoko prepará pa su salida. Esun ku ta lag’é bai so, miéntras ku e èks detenido ta drenta den un komunidat. Tabata mas miho pa entre otro informa e instanshanan konserní ku ta libera e persona i menshoná ki sorto di persona ta regresá den komunidat.
E echo ku hóbennan na Kòrsou ta forma un parti grandi di kriminalidat, no ta algu straňo. Segun Inderson, esaki ta un fenómeno mundial. En general edat dje detenidonan ta varia entre 18 pa 40 aña.’ Ta den e nukleo ei tin e hendenan ku ke purba hasi nan kosnan’.
Pero ta keda importante pa traha un maneho dirigí riba e hóbennan tambe, Inderson ta enfatisá.
Outor: Dulce Koopman