Scholengemeenschap Bonaire – potrèt: Belkis Osepa
KRALENDIJK – Presidente di direktiva Frans Lauxen di Stichting Scholengemeenschap Bonaire (SGB) ta tuma sekretario di estado Dekker di enseñansa su pronunsiashonnan masha na malu. Dekker a duna e direktiva te medio aprel pa tuma retiru pa motibu di un rapòrt krítiko di inspekshon di enseñansa. Lauxen: “Esaki ta puramente maluso di poder. E ta kousando daño severo na e skol.
Lauxen ta reakshoná rabiá riba e ultimátùm di Dekker. “E konflikto aki ta serka wes. Mientrastantu ku t’asina, e no por hasi e kos akí. Su pronunsiashonnan ta trese masha hopi intrankilidat na e skol. Dekker ta manipulá opinion i e mes ta mek riba un konflikto.”
Imágen robes
Entretantu direktiva di SGB a informá su personal. “ E rapòrt destruktivo di inspekshon no ta duna balor na e akshonnan ku a tuma. E akshonnan aki ta konforme e plan di mehorashon. Direktiva ta bisa ku e rapòrt ta duna un imágen robes di e desaroyonan den SGB. E trayekto di mehorashon no ta logra pasobra e medionan finansiero ku a primintí ta keda atras.”
Lauxen a ferwagt esaki kaba. “Diferente be nos a pidi pa papia ku Dekker pero e ta ninga. E no ke deliberá ku nos.”
Informá Tweede Kamer robes
E tres lunanan binidero tin tres oudiensia planeá tokante e konflikto entre e direktiva di SGB i e ministerio di OCW. “A informá Tweede Kamer robes. E último seis simannan m’a papia individualmente ku ámtenar haltu. Nan ke yuda si. Pero na kabamentu di e kombersashon kada be nan ta bisa: e kombersashon aki no a tuma luga. Tin un kultura di miedu enorme na ministerionan hulandes. Ámtenarnan ku posishon haltu tin miedu di pèrdè nan trabou.”
Den e rapòrt di inspekshon tin pará ku e direktiva no tin bista riba e kalidat di e enseñansa i e finansanan i ku no a kumpli ku e palabrashonnan pa koperá ku e coachnan di maneho hulandes, Dekker ta bisa. Lauxen ta kontestá: “E coachnan di maneho a bini aña pasá i tabata kana rònt ku un agènda dòbel.”
Eksperiensha i sabiduria
Lauxen ta keha riba e falta di deliberashon entre e direktiva i OCW. E direktiva asta no a haña un konfirmashon ku a risibí e rapòrt di mehorashon ku nan a traha.” Dekker no ke skucha nos. Mi tin sigur 35 aña di eksperiensha den enseñansa. Mi ta un sientífiko spesialisá den komportashon. Mi tin e eksperiensha i e sabiduria.
Promé ku fin di luna e maneho di SGB mester reakshoná. Dekker a indiká kaba ku no por skapa un instrukshon. Ademas tin diskushon tambe tokante e posishon di direktor general Lydia Emerencia. E ta riba un liña ku e direktiva tokante e plannan pa mehorá e enseñansa. Ounke Dekker no tin nada di bisa di e maneho di personal di SGB, Lauxen ta kere ku na final Emerencia tambe lo tin ku bai.
Konstitushon
E maneho mester skohe un manager interino, ku Dekker ta bai di akuerdo kuné. “Esaki no por. Tin libertat di enseñansa. Lei ta dikta ku e ministerio i gobièrnu mester krea e kondishonnan pa e direktiva por hasi su trabou. Mas leu ku esaki e sekretario di estado no por mete.”
Lauxen ta pinta e esensia di e konflikto. “E skolnan básiko ta tratando di superá. Tin alumno ku tin tres aña di retraso ku matemátika i idioma. Ku e retraso aki nan ta drenta SGB. Den kuater aña nos mester laga nan alkansá e nivel deseá. Dekker ta bisa: ami ta hinka plaka aden i boso mester djis hasi e trabou. E finansanan í e metanan ku a pone mester ta riba nivel na 2016. Pero esaki no por no, 2016 no ta alkansabel. E gòlpi ta pa kore ku nos i pone hende ku si e ta kere ku nan por logra den e tempu stipulá.”
Outor: Belkis Osepa