Percy Pinedo i Jacqueline van Zuijlen ta deklará ku nunka no a someté un produkshon lokal | Potrèt : Deya Mensche
WILLEMSTAD – E di kuater edishon di Curaçao International Film Festival Rotterdam lo tuma lugá dia 25 pa 29 di mart 2015 na ‘the Cinemas’. E festival ke fungi komo un portal di pelíkula entre Karibe, Latino Amérika i Europa. Pa un motibu of otro, produkshonnan lokal no ta probechá di e plataforma ku CIFFR ta brinda.
CIFFR tin su programashon regular, unda esaki ta selektá produkshonnan nobo den region i Latino Amérika pa mustra durante e festival. Tambe tin dos kompetensia, kual ta ‘Yellow Robin Award’ i ‘Short Movies, Big Stories’, ku ta tuma lugá durante e festival. Pa ‘Yellow Robin Award’, te ainda nunka no a nominá un produkshon lokal. Boseronan Percy Pinedo i Jacqueline van Zuijlen ta deklará ku nunka no a someté un produkshon lokal. Te ainda ta ‘E Leyenda di Buchi Fil’ ta e úniko produkshon di Kòrsou ku a mustra durante e festival.
Ora a puntra e produktornan di sine kurasoleño kiko a stroba nan partisipashon den CIFFR, kasi tur a indiká ku e reglanan di e festival ta un poko konfuso i rígido. Angela Roe, produktora di ‘Sombra di Kolo’, ta komprondé e reglanan di e festival perfektamente, pero ta indiká ku tin asina tiki produkshon lokal ku ta realisá anualmente, ku e reglanan di e festival lo por ta un tiki mas fleksibel. “Lo ta tremendo pa tin un plataforma ku por simpatisá ku e realidat ku un produktor di pelíkula ta enfrentá”, ela deklará. German Gruber Jr., produktor di ‘E Leyenda di Buchi Fil’ i ‘Sensei Redenshon’, no ta haña ku su pelíkulanan ta komersial, pasobra nan a trahá nan artesanalmente.
Segun Dolph van Stapele, produktor di ‘Tula: The Revolt’, e delaster añanan, e komunidat di sine kurasoleño a krese eksponensialmente. E avansenan teknológiko a duna e produktor chikí e poder pa traha ku ekipo di kalidat pero ku un presupuesto abou, Gruber Jr. a kontinuá. Pero e komunidat di sine lokal mester di hopi sosten, el a splika.
E problema, segun van Stapele, ta ku e komunidat di sine lokal no ta regulá i no ta haña supsidio di gobièrnu, i asina ta krea un dependensia di sektor privá. Según van Stapele, e komunidat mester di un fondo sinematográfiko i un hunta ku por maneh’e. “Den sinku aña bo por kultivá un generashon nobo di sinematógrafo, pero mester invertí sèn pa esaki bira realidat”, van Stapele a konkluí. “Mi ta kere ku mi por hungá un papel den su unifikashon, kreando un industria strukturá”, el a añadi.
Segun Segni Bernadina, direktor di Teater Luna Blou, skolnan mester di hopi motivashon pa matrikulá e kompetensia SMBS den nan kuríkulo general, pa asina mantené e interes haltu bou di e hóbennan. “Kompará ku e promé aña, e edishonnan siguiente tabatin ménos hóben ku a partisipá den e kompetensia”, Roe a remarká. E aña akí ‘Distansia’ a gana den e kategoria di fikshon, ‘Press on Marelly’ den e kategoria di dokumentario i Fellow ft Ritmo Real – ‘Hasí manera bo no sa’ a gana den e kategoria di videoclip.
Según Bernadina, Fundashon Bon Intenshon, via di CIFFR, tin e oportunidat di bira e patrosinadó di sine i arte lokal, si e tuma e batuta. “Si bo tin e kapasidat i moda pa realmente hasí un diferensia den e komunidat sinematográfiko, no limitá bo impakto”, Roe a agregá.
“Te ainda CIFFR ta kumpli ku un funshon sosial, pero na mi pareser ainda e no a definí su propósito sosial”, Gruber Jr. a konkluí.
Outor Deya Mensche