Minister Ronald Plasterk – potrèt: Pieter Hofmann
DEN HAAG – Tweede Kamer ke pa minister Ronald Plasterk (Asuntunan Interior i Relashonnan den Reino) hasi mas pa haña gobernashon integro den e parti karibense di reino. Esaki a sali awe durante un deliberashon general ku e komishon di Relashonnan den Reino. Plasterk (PvdA) ta primintí pa promé ku zomer bini ku un plan pa mehorashon di bon gobernashon.
Plasterk su kópartidario Roelof van Laar ke instalá un komishon di supervishon di integridat. Esaki mester duna notifikashon ora tin problema di integridat den gobièrnu general. Segun e, aktualmente tin un diferensha masha grandi den di un banda no hasi nada òf di otro banda duna un instrukshon via Konseho di Ministernan di Reino. Plasterk a primintí ku riba e próksimo Konferensha di Reino e lo trese esaki dilanti.
André Bosman (VVD) ke nombra un Ofishal di Reino ku den Ministerio Públiko ta pará mas haltu ku prokurador general (PG), un tipo di ‘super-PG’. E Ofishal di Reino lo fókùs riba kriminalidat ku ta krusa frontera i mester revelá fluho di plaka dubioso.
Revelá fluho di plaka
Ronald van Raak (SP) tambe ta entusiasmá pa investigá unda e plaka ta keda: “Kòrsou i Sint Maarten ta e wasmasjinnan di laba plaka den Karibe.” E parlamentario ta haña e islanan muchu chikitu pa por solushoná problemanan grandi asina. Hulanda mester hunga e papel di pionero den kombatimento di kriminalidat i garantia di bon gobernashon.
E parlamentarionan tin diferensha di opinion tokante e pregunta ki papel Hulanda mester hunga den promoshon di bon gobernashon den otro pais den reino – i di ki manera. E partidonan mes ta unánime si ku e problemanan di integridat di gobernashon na Kòrsou i Sint Maarten a sali fo’i man. Tambe a animá Plasterk eksplisítamente pa hasi un esfuerso mas aktivo den esaki. Te aworakí e minister a despachá e problemasia aki komo asunto interno di e paisnan mes.
E motibu pa e deliberashon tabata e hòrtamentu di dato na servisio sekreto di Kòrsou VDC, ku a pone ku datonan di entre otro servisionan di informashon hulandes i merikano a kai den man di kriminal. Plasterk no ker a papia nada di e asuntu i despues tampoko no ker a bisa nada di e ladronisia di dato na VDK.
Enfoke
Plasterk ke un enfoke amplio i konhunto pa evitá ku e problema lo muda di un área pa un otro. Amplio den e sentido ku ta reforsá tur organisashon den e kadena hudisial, i konhunto den e sentido ku e paisnan den Reino mester koperá riba e tereno aki. Plasterk: “Laga bisa ku riba un isla den Reino bo ta kombatí kriminalidat na un manera masha efektivo anto djei e kriminalnan ta bai un di e otro islanan, esaki no ta solushoná nada.”
Outor Pieter Hofmann