Liesbeth Spies – Potrèt: Pieter Hofmann

Liesbeth Spies – Potrèt: Pieter Hofmann

ALPHEN AAN DEN RIJN – Investigadónan di e komishon di evaluashon di Hulanda Karibense pronto lo biaha pa Boneiru, Saba i Sint Eustatius. Ei nan lo evaluá e konsekuenshanan di e reformashon estatal di 10-10-’10.

E investigadónan ta konsentrá riba legislashon, organisashon gubernamental i e nivel di previshon. Kada un di e tres terenonan aki tin su propio tim di investigashon. Rijksuniversiteit Groningen ta investigá legislashon. DSP lo eksaminá e forsa di gobièrnu i Sociaal Cultureel Planbureau den koperashon ku Ecorys lo kontrolá e nivel di previshon.

E investigadónan lo kompartí loke nan haña sa ku e komishon di evaluashon. Liesbeth Spies, ku na 2011 komo minister di Asuntunan Interior i Relashonnan den Reino tabata responsabel pa implementashon di e renobashon estatal, awor ta presidente di e komishon di evaluashon. Mas o ménos 10 di òktober, despues di sinku aña, e rapòrt final mester sali.

Atministrashon básiko
E tarea di e investigadónan no ta fásil, pasobra ora a inkorporá e islanan den Hulanda riba 10-10-’10 nunka no a midi kon e situashon tabata e dia ei. Esaki aktualmente ta trese problema. Spies ta indiká ku ta difísil pa reuní i klasifiká e hendenan di ken ta trata. “E atministrashon básiko mes ta den desaroyo ainda, ke men nòmber i informashon tokante adres ta masha limitá. Bo no por bisa ku siguransa kuantu hende tin ta biba na Boneiru.”

E datonan aki ta nesesario pa por aserká e hendenan aki telefónikamente. Ademas siudadanonan por bai e konsultanan habrí pa komparti nan vishon ku e investigadónan di e komishon. Hende por komparti nan relato tambe via e website di e komishon di evaluashon. No tin masha reakshon, Spies ta atmití. “Pero esaki ta lógiko den e fase aki di e investigashon.”

Relevansha
E komishon no ta duna rekomendashon den e rapòrt. “Nò, esei ta polítika mester hasi”, Spies ta bisa. E èks minister ta bisa ku e komishon lo no evitá ku e rapòrt ta disparse den un lachi. Esaki ta un enkargo legal, sabiendo masha bon ku den e kambio estatal a inkorporá un enkargo di evaluashon. Mi ta sali for di e punto di bista ku nos lo hasi nos trabou asina transparente ku no tin skapamentu. Si e konklushonnan ta sufisientemente transparente i fact-based ta parse mi ku nos dunadónan di enkargo mester pone man na obra.”

Outor Pieter Hofmann