Frits Goedgedrag – foto: Extra Boneiru
KRALENDIJK – Sekretario di Estado Sander Dekker a apuntá Frits de los Santos
Goedgedrag komo e persona ku mester bai intermediá den e problema ku a surgi na Komunidat di Skol Boneriano (SGB). Ayera den un konferensia di prensa Diputado Jona Chirino a mustra riba e ròl ku gobièrnu tin den enseñansa na Boneiru. Tambe e diputado a suprayá e ròl ku e komo diputado di enseñansa tin pa ku lokual ta tumando lugá na SGB.
Diputado Jona Chirino: “Algun akshon ku mi tabatin komo diputado di enseñanza na promé lugá tabata pa bai mesa ku direktiva di SGB pa wak unda e problema ta entre SGB i Ministerio di Enseñansa di Hulanda. Mi tabatin kombersashon ku e Sekretario di Estado, dosentenan i tambe mayornan. Lokual gobièrnu ta pruba di hasi ta di ser e intermediadó, òf funshoná komo e brùg entre Ministerio di Enseñansa i direktiva di SGB.
Mas aleu diputado Chirino a trese dilanti ku den e karta ku direktiva di SGB a manda pa e Sekretario di Estado, kaminda nan ta pidi pa tin un Senioren Raad, ku lo mester fortifiká e direktiva pa sigui dilanti.
Den un kombersashon ku e diputado tabatin ayera ku Sekretario di Estado Dekker, el a pidi diputado pa keda den kombersashon i alabes a partisipá ku e siman aki Frits Goedgedrag lo bini Boneiru komo un intermediadó pa yega na solushon no solamente hende grandi, sino tambe solushon kardinal na bienestar di e hóbennan di SGB, tambe pa e futuro generashon ku lo tini na e skol.
Bron Èxtra Boneiru