Robbie Beukenboom – foto: Belkis Osepa
KRALENDIJK – E komishon negoshadó pa Partido Demokrat pa yega na un gobièrnu pa Boneiru a manda un karta pa e presidente di partido MPB, Ibi Antonius, pa bisa ku ta bai habri kombersashon ku UPB. E karta na nòmber di Partido Demokrat ta firmá pa komishon negoshadó.
E karta dirigí na MPB ta bisa: “Riba 31 di mart 2015 Partido Demokrátiko Boneriano (PDB) a presentá na Movementu di Pueblo Boneriano (MPB) un proposishon pa un kombenio di un vishon integral pa desaroyo di e Struktura Estatal di Boneiru riba tèrmino korto, medio i largu ku ademas ta enserá proposishon pa organisashon di referèndem pa brinda pueblo di Boneiru e oportunidat pa ekspresá su mes den un forma liber i sekreto riba su deseo pa ku futuro di nos isla.”
Mas aleu e karta dirigí na MPB ta bisa: “Tumando nota ku miembronan di MPB presente na mesa di negoshashon no tabata riba mesun liña pa ku e tópiko di Struktura Estatal, MPB a proponé pa tuma un poko tempu pa atendé e tópiko importante aki internamente. MPB na su turno a indiká ku enbèrdat nan komo organisashon no a trata e tópiko di Struktura Estatal den sufisiente profundidat ainda pa nan a formulá un posishon komun komo partido, pa e motibu ei a akseptá e proposishon pa tuma mas tempu pa trata e tema den nan seno promé.”
Mas aleu e dos firmantenan di e karta, Robby Beukenboom i Clark Abraham, ta trese den nan karta ku MPB a kanselá e siguiente reunión e dia despues i e siguiente reunion di e partidonan a tuma lugá riba 7 di aprel 2015. Den e reunion aki MPB a duna di konosé ku nan no ta kompartí nos posishon manera stipulá den nos proposishon.
Sinembargo MPB no por a indiká kiko ta e adaptashon òf alternativa ku nan ta proponé. Na final di e reunion por a konkluí ku integrantenan di MPB no a lesa e proposishon presentá pa PDB i por sierto despues di shete dia no a yega na un posishon komun den seno di MPB. A akordá di bolbe duna MPB mas tempu pa yega na un posishon komun, i ku nan lo presentá nan proposishon e siguiente dia ku ta 8 di aprel pa asina nos trata esaki den reunion e mesun anochi.
E proposishon aki te awe no a yega e Komishon di Negoshashon di PDB konforme palabrashon. “Entretantu e mesun anochi di 8 di aprel 2015, nos Konseho di Partido a yama un reunion urgente ku Komishon di Nogoshashon pa duna kuenta i rason riba progreso di negoshashon nan pa un Gobièrnu nobo pa Boneiru. Den e reunion aki, nos Konseho di Partido a duna di konosé di ta di opinion ku mester yega na un gobernashon stabil i di kontenido pa Boneiru mas rápido posibel.
Tumando nota di e tempu ku MPB a tuma pa analisá i formulá un posishon riba nos proposishon sin por presentá posibel adaptashon òf alternativa i e situashon kaminda e organisashon polítiko ta indesiso riba e punto di Struktura Estatal, nos konseho a instruí nos komo Komishon di Negoshashon pa lo mas pronto posibel sondia otro alternativanan pa yega na un Gobernashon pa Boneiru, mientrastantu MPB ta tuma e tempu nesesario pa atendé e tópiko riba mesa den su propio seno.”
Pa e motibu ariba menshoná, bou di instrukshon di Konseho di Partido Demokrat, e komishon ta obligá di informá MPB ku por inmediato komishon lo entamá un proseso pa aserka otro posibel partnernan riba un intento pa yega na un Gobernashon duradero pa Boneiru.
Fuente Èxtra Boneiru