Scholengemeenschap Bonaire – potrèt: Belkis Osepa
KRALENDIJK – Ta promé bia ku den historia di SGB ku a pidi i haña input di dosentenan den formulashon di metanan di mehorashon di e skol. Den e sentido aki por bisa trankilamente ku e plan di mehorashon ku e skol a traha ta di e ekipo di e skol i no un dokumento ‘top-down’ manera hopi otro.
Ku esaki a kumpli ku eksigensia di sekretario di estado pa enseñansa Sander Dekkers pa traha un plan di mehorashon ku tin sosten i aseptashon amplio. Direktiva di SGB ta bisa esaki den e karta habrí ku el a manda pa e komishon fiho di enseñansa di Tweede Kamer, pidiendo e komishon pa sosten pa ehekushon di e plan aki.
E direktiva ta splika ku ta for di sèptèmber 2014 a kuminsá traha riba e plan di mehorashon ku OCW a eksigí. Pa logra esaki a instituí un organisashon di proyekto ku tabata konsistí di entre otro di 6 grupo di desaroyo di proyekto (POG). Ta e POGnan aki a desaroyá e plan di mehorashon.
Na tur mas o ménos 43 kolaboradó di tur e tres unidatnan i mayoria di e áreanan di materia, tabata representá. Dentro di e grupo di kolaboradónan aki tabatin sinku lider di ekipo, pues personanan ku funshon di duna guia, pero tambe personanan ku a kaba kuminsá traha.
E plan di mehorashon “SGB: Ekselensia den Desaroyo” ta sali for di 5 tema di mehorashon. Relashoná ku kada tema e POGnan a analisá e konklushonnan di inspekshon profundamente, duna komentario riba esakinan i hasi un análisis di swot ekstenso, i stipulá e puntonan di lansa, i pa kada punto pone dos òf mas meta smart.
Riba 28 di novèmber aña pasá, pues na tempu, a entregá e plan na Gezaghèber di Boneiru, representante di reino i na OCW-RCN.
Fuente Èxtra Boneiru