Franklin Meyers: “Ami no ta koperá ku esaki”- potrèt: Facebook
PHILIPSBURG – E debate parlamentario tokante lantamentu di un kámara di integridat ta difísil. Den e komishon sentral djaluna a kuminsá ta parse manera tin un mayoria kontra e proposishon. E presidente di e frakshon di e partido di gobièrnu UP Franklin Meyers, a ekspresá ku palabranan skèrpi: “Ami no ta koperá ku esaki.”
Si parlamento vota kontra e proposishon, gobièrnu tin un problema. Djadumingu promé minister Gumbs i minister di Hustisia Richardson ta biaha pa Hulanda pa kombersá ku promé minister Mark Rutte i minister di Relashonnan di Reino Ronald Plasterk.
Deskonfiansa
Richardson ta bisa ku e posishon di e pais ta mas fuerte si e aprobá su propio legislashon, pero no ta parse manera esaki lo bai sosodé.
E kámara di integridat ta un rekomendashon di e rapòrt di e komishon bou di maneho di abogado Bob Wit. Kuminsamentu di febrüari Gumbs a presentá e konsepto di e dekreto na media. Pero Hulanda no ta konfia e asuntu i den un Medida General di Gobièrnu di Reino a establesé un otro modelo pa e kámara di integridat.
Otro siman e partidonan ta negoshá tokante un areglo, pero e areglo i e proposishon di Hulanda ta ménos favorabel pa Sint Maarten ku e dekreto ku e gabinete Gumbs a harma den un tempu rèkert.
“E kámara di integridat ta manda mi pueblo bèk den tempu di kolonialismo i sklabitut”, Meyers ta haña. “E úniko solushon ta independensha kompleto. Mi ta preferá di muri riba mi pianan i no biba na rudia.
Lider di partido Theo Heyliger ta infelis ku e proposishon pero e ta bisa ku e lo no por vota kontra. Den oposishon ta reina hopi resistensia i duda. Aña pasa gobièrnu i parlamento ainda a deklará ku nan ta brasa e rekomendashonnan di tur rapòrt di integridat.
Outor Hilbert Haar