Trahe folklóriko riba Dia di Rincon – potrèt: Belkis Osepa
KRALENDIJK — Na momento ku Rei Willem Alexander a keda koroná komo Rei, dia 27 di aprel ku ta su fecha natal, a keda proklamá ofishalmente komo dia liber. Dia 30 di aprel, e dia ku su Mahestat Reina Juliana tabata kumpli aña, na Boneiru pa bintisinku aña a selebrá Dia di Rincon riba e dia aki dor ku e tabata un dia liber.
Na un dado momento ora Rei Willem Alexander a skohe pa selebrá Dia di Rei riba su fecha natal, e selebrashon di Dia di Rincon a kore peliger dor ku e dia liber lo a kaduká. A krea un insertidumbre bou di organisadónan di Dia di Rincon i tambe bishitantenan.
Pa e motibu aki Gobièrnu di Boneiru a opta pa manda un karta pa minister di Asuntunan Interno i Relashonnan di Reino, Ronald Plasterk, indikando kon importante e dia aki ta pa e pueblo di Boneiru i su bishitantenan, dunadónan di trabou, sindikatonan i gobièrnu di Boneiru.
Mirando e echo ku te ainda no a haña ningun kontesta di parti di minister Plasterk, gobièrnu di Boneiru a hiba kombersashon ku e partnernan sosial aki na Boneiru den kuadro di Diálogo Sentral. Aki nan a sinta representantenan di dunadónan di trabou i sindikatonan.
Durante e enkuentro aki, gobièrnu konhuntamente ku tur e partnernan, a skohe pa mantené e kantidat di dianan ofishal den un aña igual. Esei a trese kuné ku mester a entregá un otro dia. Den e konsulta tripartit aki, a disidí pa kambia dia 15 desèmber ku ta dia ku tabata selebrá Dia di Reino, pa dia 30 aprel i asina mantené dia 30 di aprel komo dia liber riba kua Boneiru ta keda selebrá. Dia di Rincon komo un fiesta rekonosé.
Fuente Èxtra Boneiru