Investigadó Monique Turkenburg ta enfatisá ku e tim ta independiente i ku nan ta hasi tur loke nan por pa papia ku ‘e bonerianu’ – potrèt Elisa Koek
KRALENDIJK – “Kiko ta malu? Tur kos ta malu!”, un hòmber ta grita un di e investigadónan di e komishon di evaluashon. E komishon a bini for di Hulanda pa bin investigá e efekto di renobashonnan estatal na Boneiru. Awe meinta nan a risibí mas o ménos trinta bonerianu den Divi Flamingo Resort & Casino.
Mayoria di e bishitantenan ta bon prepará: nan ta yega ku nan map ku anotashon pa komparti nan punto. Tòg nan tin tiki speransa. “Kon e hendenan aki ke skucha bos di pueblo si nan no ta papia e idioma di pueblo”, Betty Engelhardt ta puntra su mes.
Blocnote
Engelhardt despues di 10-10-’10 tabatin e speransa ku kos lo bira mihó na Boneiru, pero segun e esaki sigur no ta e kaso. “E pobresa ta hasi doló i kriminalidat ta oumentá. E polítikonan hulandes ta bini aki pa wak problema, pero aparentemente semper nan ta lubidá nan blocnote.
Ora Engelhardt sali bèk un ratu despues e ta positivo. “Nan a skucha sigur sigur”, e ta bisa ku un sonrisa riba su kara. Tòg e no ta kere ku e komishon lo hasi un diferensha. “E hendenan ku t’aki aworakí no ta tuma desishon. Ta hende di Den Haag ta hasi esei i mi tin poko speransa. Nan mester ta honesto i atmití ku e ‘Proyekto Boneiru’ a faya kompletamente. Esei ta mihó kos pa Boneiru, pasobra mi no ta mira un solushon.”
Michèle Knuf i Marga Domingo huntu a papia ku un investigadó. Ora puntra nan si nan ta satisfecho nan ta basha harimentu. “E kontakto entre Boneiru i Hulanda ta keda di un banda so”, Knuf ta bisa. “Mester skucha otro promé ku tuma desishon. Nos ta spera riba un diálogo abierto.”
Domingo ta añadí: “Ami no tabatin e speransa ku Boneiru lo a bira igual na otro munisipio hulandes, pero Hulanda mes ta lubidá ku nos ta un ‘munisipio ekstraordinario’. Un munisipio ku un aeropuerto, un terminal di zeta i un hòspital, kos ku munisipio normal no tin. Awe nos a duna nos opinion ku e speransa ku lo skucha nos. Mas ku esei nos no por hasi.”
Miéntras ku e otro hendenan ta papia ku e investigadónan ta pidi e lider di Nos Ke Boneiru Bèk, James Finies, pa sali for di e sala. Su presensia lo ta intimidá e otro bishitantenan. “Mi tabata sinta riba un banki ta kombersá, ma nan ke pa mi bai.” E ta bisa. Segun Finies e akshon ta representativo pa e kondukta di Hulanda den direkshon di Boneiru. “Mi tin mag di papia lihe lihe loke mi ke bisa anto kaba mi tin ku bai. Nan no ta interesá den bos di pueblo. Pakiko bo ta kere a skohe pa Divi Flamingo Resort? Ta ken ta bini aki och’or di meinta?”
Speransa
Investigadó Monique Turkenburg ta enfatisá ku e tim ta independiente i ku nan ta hasi tur nan esfuerso pa papia ku ‘e bonerianu’. Nan ta hasi esaki via e enkuentronan aki, pero tambe via entrevista telefóniko, kombersashon ku grupo i kombersashon ku representantenan. “Lástimamente mi no ta papia papiamentu, pero di tur manera nos ta tene un di e kombersashonnan di tim na papiamentu. Awor tin un intérprete tambe ke men tur hende por komuniká den nan mes idioma. Mi speransa berdaderamente ta pa nos por laga skucha bos di pueblo.”
Djaluna tin un di dos oportunidat pa papia ku un tim di evaluashon. Na lo ta na Sentro di Bario Rincon di 17.00 pa 19.00 or.
Outor Elisa Koek