Awe meinta trempan a transportá e kurpa di e studiante den un bùs pretu bai aeropuerto – potrèt: Hazel Durand
THE BOTTOM – E kurpa di e studiante femenino merikano di 24 aña di Saba University School of Medicine ta na kaminda pa Hulanda pa un outopsia. Un tim di e Instituto Forénsiko Hulandes (NFI) ta ferwagt e promé resultadonan di e sekshon den kurso di e siman binidero.
E famianan di e defuntu a haña informashon na Saba. Por lo pronto nan ke tene e identidat di nan yu muhé ku nan a haña morto den su apartamento na The Bottom djarason sekreto. Awor ku ainda no ta kla kiko ta e kousa di e morto i si ta trata di un krímen, Ministerio Publiko ta bai di akuerdo ku e deseo di e famianan.
Polis ta informá ku e investigashon, ku a haña e nòmber ‘Hector’, ta nesesario pa hasi un sekshon hudisial. E sirkunstanshanan bou di kua a haña e muhé no ta duna informashon tokante kousa di su morto. E sekshon kompleto ta enserá investigashonnan ku lo tuma mas tempu. E resultadonan definitivo i kompleto lo tarda poko mas.
Reputashon
E komunidat di Saba ku normalmente ta trankil ta tur arib’abou for di dia ku e studiante a muri. Hopi sabano tin miedu ku si resultá ku ta trata di un krímen, esaki lo tin impakto grandi riba e reputashon di nan isla ku te awe tabata puru.
Polis lokal ta enfatisá ku te dia ku tur resultado di investigashon t’aden i ku a kompará nan ku entre otro deklarashonnan di testigu, no ta duna informashon tokante e loke ku a sosodé. Konklushonnan anterior ku a saka for di rumornan segun polis ta prematuro.
Outor Hazel Durand