Dia di Rincon – Potrèt: Belkis Osepa
KRALENDIJK – Tur e beheit ku eks-diputado Jona Chirino-Felida a hasi tokante ‘Dia di Rincon’, den sentido ku dia 30 di aprel lo ta un dia ofisialmente liber, a resultá di no ta e kaso.
Minister Ronald Plasterk a informá ku Hulanda no ta duna e dia aki ofisialmente liber pa Boneiru, pa asina habitantenan di e isla aki por selebrá ‘Dia di Rincon’. Trabou den komèrsio ta sigui normalmente, meskos tambe pa empleadonan di RCN, ku chèns sinembargo ku por duna nan mitar dia liber manera aña pasá.
Minister Plasterk den un karta fechá 16 di aprel último ta indiká ku den un karta anterior el a informá Bestuurscollege di Boneiru kaba ku tin dos direkshon ku por sigui pa logra ku dia 30 di aprel ta bira un dia oficial liber. Esta sea ta kambia un dia liber den aña ku 30 di aprel òf ta krea un dia liber èkstra. Den ámbos kaso lo mester konsultá ku doñonan di trabou den sektor públiko i privá.
Den un kontesta riba e karta di febrüari di parti e minister Bestuurscollege a bisa ku nan lo a deseá di mantené e kantidat di dianan liber den aña igual. Alabes Bestuurscollege a ekspresá su preferensia pa kambia dia 15 di desèmber, Dia di Reino, pa 30 di aprel. Ei mes Bestuurscollege a bisa ku e no a sinkronisá esaki ku e entidatnan públiko di St.Eustatius i Saba.
Segun Plasterk, basá riba artíkulo 23 di Arbeidswet 2000 BES, no por konsiderá 15 di desèmber komo un dia liber ofisialmente pa sektor privá. Ku otro palabra, e no ta un dia general liber pa tur boneriano. Un elaborashon di e proposishon aki lo resultá den un desigualdat legal entre esnan ku ta trata den sektor públiko i esnan den sektor partikular. Plasterk no ta haña esaki deseabel.
Dia di Reino pues no ta un dia adekuá pa kambia ku dia 30 di aprel, esta ku e meta pa hasi ‘Dia di Rincon’ un dia liber pa tur hende. Plasterk: “Na e momentu aki ‘Dia di Rincon’ no ta un dia ofisial liber. Manera mi a bisa den mi karta di 11 di febrüari, lo mi ke yuda pensa un otro solushon. Mi ta pensa den direkshon di dia 1 di mei, ku ta Dia di Obrero.”
Fuente Èxtra Boneiru