Raymi Sambo, e embahador kurasoleño di Amsterdam Gay Pride ta entregá e pakete di deseonan huntu ku Ramona Pikeur na e ministernan plenipotensiario i minister Bussemaker (Emansipashon) – potrèt: John Samson
DEN HAAG – Representantenan di tur gobièrnu den reino ta di akuerdo: hende homoseksual lo mester haña derecho igual na Aruba, Kòrsou i Sint Maarten. E minister hulandes Jet Bussemaker (Emansipashon) i e ministernan plenipotensiario di Kòrsou i Sint Maarten djarason na Den Haag a risibí un pakete di deseo di protekshon di esnan ku ta atendé interes di derechonan di hende homoseksual.
Gobièrnu di Kòrsou tambe ta pro ‘derecho igual pa tur hende’, asina minister plenipotensiario Marvelyne Wiels ta sigurá. Su partido Pueblo Soberano (PS) no opstante e resistensia di nan partidario i parlamentario Winifred Raveneau, ta simpatisadó pa duna hende LHBT (Lesbian, Gay, Bisexual, Transgender) derecho igual.
Gay Pride
Na 2013 Raveneau a duna resistensia skèrpi kontra Gay Pride na Kòrsou. E organisashon di Gay Pride na último momento a haña un pèrmit extremamente severo ku a pone ku nan a haña nan ta tene nan fiesta den un hotel.
Den e pakete di deseo na nòmber di diferente organisashonnan di interes di e partinan di reino karibense ta boga pa derecho igual riba e islanan i mihó informashon na skolnan tokante homoseksualidat. Durante di e rueda di prensa na Den Haag tambe a anunsiá ku riba promé di ougùstùs lo tin un ‘Barku di Reino’ den e parada di barku di Amsterdam Gay Pride. Motibu pa esaki ta e selebrashon di 200 aña Reino Hulandes i 20 aña di eksistensha di Gay Pride.
Mentalidat
E ministernan plenipotensiario abiertamente a duna nan sosten na e lucha pa derechonan igual riba e islanan. “Un kambio di mentalidat ta tuma añanan largu. Pero kaminda tin un deseo polítiko por ratifiká kambionan di lei rápidamente””, luchadó Ramona Pikeur ta bisa. Awor ta previshon di informashon ta bini na promé lugá, e ministernan plenipotensiario ta bisa.
“Pa motibu di hopi regla i norma severo i konservativo pa hopi hóben LHBT un coming out no ta fásil”, bosero Angelo Tromp di e representashon arubano ta bisa. Hopi be ta mira nan komo persona ku un defekto i esei ta ‘un eror grandi’. “Nos mester mustra ku tur hende ta igual i ku homoseksualidat no ta un enfermedat.” Na Aruba e siman aki a entregá un proposishon pa un lei ku mester hasi posibel pa registrá partner di e mésun sekso.
Representante di gobièrnu Marvelyne Wiels di Kòrsou i Josianne Fleming-Artsen di Sint Maarten – potrèt: John Samson
Ignoransia
“Promé kos konkreto ku mi por hasi ta di duna iformasho na skolnan i na mayornan. A bira tempu pa trata ignoransia den nos komunidatnan”, e minister plenipotensiario di Sint Maarten Josianne Fleming-Artsen ta bisa. “Nos promé minister tambe ke traha na e kousa aki Nos sa masha bon ku asta na Sint Maarten sa pèster hende LHBT, sa saka nan for di kas i sa diskriminá nan.
Segun Frank Holtslag di Curaçao Gay Pride por ripará progreso kaba riba e isla: “poko tempu pasá Kòrsou a haña un premio na Los Angeles di International Gay and Lesbian Travel Assosiation, pasobra nos ta pionero den área karibense si ta trata di ‘most gay welcoming in the region’.
Outor John Samson