Situashon a-higiéniko na Plasa Bieu potrét: José Manuel Dias
WILLEMSTAD – Marshe Bieu den Punda konosí tambe komo Plasa Bieu ta hopi popular pa su platonan krioyo. Tur mèrdia por mira un gran kantidat di hende tantu lokal komo turista sintá na mesa ta kome den Plasa. Aktualmente tin un total di seis lokalidat ku ta prepará i bende kuminda den Plasa, pero kon ta ku e situashon higiéniko? E hürdónan mes ta haña ku tin hopi kos pa drecha i ta pone Fundashon Marshe responsabel pa e falta di higiena.
Fundashon Marshe ta e instansia ku aktualmente ta enkargá ku maneho i kobramentu di hür di e lokalidatnan. Segun e hürdónan e instansia aki no ta kumpliendo ku e parti di mantenshon i esaki ta afektando e situashon di higiena den Marshe Bieu. Algun di e kehonan ku a bini dilanti ta: falta di sufisiente ventilashon, flur kibrá, rut riba muraya, holó stinki di riol, tubu di awa sushi ku konstantemente ta verstòp i plaga di djaka i kakalaka.
Un reportahe di José Manuel Dias
Fundashon Marshe di su banda pa medio di su representante Rodolfo Schotborg a trese dilanti ku dia tabata negoshá e preis di hür, ta e hürdónan mes a proponé pa nan tuma e limpiesa diario pa nan kuenta. Segun Schotborg nan a hasi esaki pa asina por a tene e preis di hür mas abou posibel.
No tin sèn pa mantenshon
Aktualmente kada hürdó ta pagando 450 florin pa luna pa por hasi uso di e lokalidat di kual e komponente di hür ta 50 florin i e sobra ta pa kubri e gastunan di mantenshon. “Ku e suma aki nos no tin espasio finansiero pa hasi hopi mantenshon”, Schotborg a enfatisá. Konforme e kombenio di hür eksistente Fundashon Marshe ta responsabel pa hasi un limpiesa general un biaha pa siman.
Sin konekshon di awa
Resientemente Geneeskunde en Gezondheidzaken (G&Gz) antes GGD, mester a sera un lokalidat den Marshe Bieu pa motibu ku esaki no tabata konektá riba e ret di awa i tabata usa awa den hèmber pa prepará kuminda kuné. Schotborg a bisa ku Fundashon Marshe no tabata na altura di e kaso aki i ku konekshon di awa i koriente ta responsabilidat di e propio hürdónan.
Kontroladó Wilferd Labordus a konstatá falta di higiena den práktikamente tur lokalidat den Marshe Bieu. No opstante e situashon a-higiéniko ku a keda konstatá direktor di e sektor di Salubridat, Sirving Keli, no ta konsiderá e situashon aki komo unu alarmante pa motibu ku no tin keho riba kontaminashon di kuminda. “Marshe Bieu no ta konosí komo un área di riesgo haltu pa Salú Públiko”, Keli a bisa.
Falta di kontròl
Segun Sirving Keli bou di kondishonnan normal G&Gz ta kontrolá establesimentunan ku ta bende kuminda dos te kuater bes den un aña. Sinembargo debí na falta di personal aktualmente ta dunando prioridat na establesimentunan ku tin riesgo haltu manera restorantnan ku ta bende kuminda kurú. N’e momentu aki G&Gz ta disponé di únikamente dies kontroladó di kual próksimamente dos lo baha ku penshun.
Pa loke ta e situashon a-higiéniko ku a keda konstatá den Plasa Bieu kontroladó Labordus a indiká ku lo tene kontròl mas regular pa wak si e hürdónan a sigui tur e instrukshonnan ku nan a haña.
Outor José Manuel Dias