Sekretario di estado Dekker di Enseñansa (meimei) – potrèt: John Samson
DEN HAAG – Un komishon ta investigá si e direktiva nobo di Scholengemeenschap Bonaire (SGB) ta kapas di trese e kalidat na un nivel akseptabel lihé. Sino mester intervení atrobe. Asina sekretario di estado Dekker a bisa djaweps den Tweede Kamer.
E komishon lo laga minister Jet Bussemaker i Dekker sa pronto si e direktiva por manehá e tarea. Sino e miembronan di direktiva mester duna nan lugá na un direktiva interino.
A pidi e direktiva anterior pa baha pa motibu di un rapòrt ku hopi krítika di Inspekshon di Enseñansa tokante kalidat di e enseñansa i di e direktiva di SGB – e úniko skol sekundario na Boneiru. A pidi e direktiva bai pa un direktiva interino por drenta, pero na lugá di esei un parti di e direktiva a baha i nan mes a buska susesor.
Inspekshon di enseñansa ta konkluí a base di bishita di trabou na mart i aprel ku kasi no por ripará mehorashon na SGB. Dekker: “Si konsiderá e direktiva nobo aki inkapas pa e tarea kompliká aki, mi ta ferwagt ku e direktiva mes ta saka su konklushonnan i lo pasa su tareanan na un direktiva interino. Si e direktiva no hasi esaki minister i ami ainda lo manda e instrukshon.”
E komishon ta konsistí di èks gezaghebber Glenn Thodé, aktualmente rèktòr di universidat di Aruba i Kete Kervezee, konsehero na e punto di sosten di skol hopi suak. Nan ta tene kombersashonnan individual i konhunto ku e direktiva aktual di SGB.
Wes
Miembronan di Tweede Kamer ta urgi e sekretario di estado pa intervení mas fuerte pa asina sosiegu reina atrobe na SGB, pero e sekretario di estado ta bisa ku mester hasi tur kos kuidadosamente i segun e proseduranan vigente. E ministerio ta tene kuenta ku den e senario di mas malu lo bini un bataya hurídiko entre e miembronan di direktiva i estado. “Si e kos aki bai dilanti wes mi ke pa nos gana.”
Mehorashon
E sekretario di estado a remarká ku último tempu ta manera e kombersashonnan ta trata solamente di SGB. “I e atenshon i prekupashon pa e skol ta hustu tambe, pero e problemanan di SGB no mester tapa tur kos ku sí a logra otro kaminda.” Por ehèmpel siman pasá a bira konosí ku tres skol básiko na Boneiru a haña e skor di kalidat básiko serka Inspekshon.
Outor John Samson