Asesinato di Helmin Wiels ketu ba sin solushon – José Manuel Dias
WILLEMSTAD – E kaso di asesinato di Helmin Wiels, ku te awe no ta solushoná, ta drenta su di dos aña bou di un silensio hermétiko di parti di Ministerio Públiko (OM).”N’e momentu aki nos no ta konsiderá oportuno pa duna komentario riba e kaso aki”. Asina Guillano Schoop, bosero di OM a bisa. Entretantu partido Pueblo Soberano (PS) a konsipiá un karta ku lo keda entregá djarason 6 di mei na Minister di Hustisia, Prokurador General i Wes Komisario.
Ku e karta aki PS ke pone preshon riba e aparato hudisial pa aselerá e investigashon den e kaso Maximus pa asina por pone man riba e outornan intelektual di e asesinato. Segun eks polis i aktualmente parlamentario pa PS, Jaime Cordoba, OM tabatin sufisiente tempu pa por a solushoná e kaso aki pero debí na fayonan ku a keda kometé te ainda no a yega n’e solushon. “For di komienso di e investigashon OM a kometé fayonan garafal”, Cordoba ta enfatisá.
Un reportahe di José Manuel Dias
E fayo di mas grandi ku a keda kometé ta ora ku a keda sin aktivá e ‘Team Grootschalig Optreden’ (TGO) na tempu. Segun Cordoba e tim aki a keda aktivá sinku dia despues ku e asesinato a tuma lugá lokual a perhudiká e investigashon enormemente. Normalmente ora ta trata di un kaso di un magnitut asina grandi mester aktivá e tim aki al instante pasobra ta e tim aki lo mester kondusí e investigashon korespondiente.
Duda den RST
E di dos fayo ku a keda kometé ta ora ku Recherche Samenwerkingsteam (RST) a tuma e rienda di e investigashon. Na opinion di Cordoba esaki a kana robes pa motibu ku RST a tene tur reshèrshi yu di Kòrsou pafó di e kaso. Aubert Wiels kende ta ruman hòmber di Helmin Wiels i fundador di Un Tim Magno ta sostené e ponensia aki i a ekspresá su dudanan den e kapasidat di RST pa resolvé e kaso.
Maximus
Despues ku Korte di Apelashon a ratifiká e kastigu di bida largu pa Elvis ‘Monster’ Kuwas pa entre otro asesinato di parlamentario Helmin Wiels, awor tur wowo ta riba e kaso Maximus kaminda ta investigando ta ken ta esun òf esunnan ku a paga pa laga mata Wiels. Aubert Wiels ta hopi desepshoná i ta reklamá ku despues ku e kaso Magnus a keda tratá den Korte nunka mas e no a tende nada di Ministerio Públiko.
Tin dos eks mandatario ku ta sospechá di ta involukrá den e kaso Maximus. Ta trata aki di eks minister di Finansa George Jamaloodin di MFK i eks minister Carlos Monk di PS kende a bisa ku ofisialmente e tambe ta sospechoso den e asesinato di Wiels.
Konmemorashon
Pa loke ta e konmemorashon di 5 di mei e aña aki atrobe tin dos akto di konmemorashon unu organisá pa Pueblo Soberano i e otro organisá pa Un Tim Magno di Aubert Wiels. Remarkabel ta ku e aña aki tur dos akto di konmemorashon ta ranka sali for di misa di Steenrijk. Meskos ku aña pasa Pueblo Soberano ta organisá un manifestashon ku lo sali 6’or di atardi for di Misa di Steenrijk i lo terminá na pir di Marie Pampoen kaminda a asesiná Helmin Wiels.
Outor José Manuel Dias