Roseline Sabat ku e mucha i hóbennan di kampamentu Futuro Briante| Potrèt: Deya Mensche
WILLEMSTAD – Kampamentu Futuro Briante ta un inisiativa di Fundashon Skol di Arte i Kultura ‘Futuro Briante’, kua ya pa nuebe aña ta trahá ku mucha i hóbennan ku tin un difikultat edukashonal of kual kièr otro desabilidat di desaroyo. Den un ambiente ameno i sano, Roseline Sabat i su tim di edukador profeshonal, ta trahá ku e muchanan riba diferente aptitut esensial pa nan progreso general i edukashonal.
Despues di un trayektoria profeshonal ekstensivo komo trahadó sosial, Sabat a opta pa drenta den edukashon pasobra ela mira e nesesidat enorme den nos komunidat pa guia i kièr a trahá ku e mucha preventivamente. “Mi no ke trahá na skol so ku e mucha, pero mi ke un vínkulo más estrecho pafó di skol”, ela splika.
Na 2010, Sabat i su tim a kuminsá un ADHD Adventure Camp ku un ‘Outdoor Vacation School’, i su guianan ta bini di diferente disiplina manera maestronan di skol, trahadonan sosial i trahadó sosial pedagógiko, kende te ainda ta trahando riba base boluntario pa motibu di falta di fondo. Ta opera e kampamentunan riba donashonnan priva i ‘fundraising’ ku ta keda organisá.
E aña akí e fundashon tin sinku kampamentu plania, kual e promé, ku e tema ‘disiplina i struktura’, a tumá lugá na aprel ultimo. “Nos a konstatá ku hopi mucha falta esaki na kas i e formashon básiko no tei”, Sabat a splika. Pa e kampamentunan benidero, kada unu lo enfoká riba un diferente área di aptitud personal. E siguiente kampamentu lo tumá lugá na Boneiru entre 6 pa 10 di yüli i 13 pa 14 di yüli, unda lo eksplorá e diferente talento di aproksimadamente 85 mucha. Adishonalmente tin kampamentu plania riba 4 pa 9 di Òktober, i finalmente 20 pa 25 di Desèmber.
Durante di e ultimo kampamentu na Aprel, bou di guia di kapelan Martina i militarnan boluntario di kazèrne, a hasí hopi ehersisio físiko ku e muchanan, unda a komuniká e mensahe ku disiplina bo ta yegá leu den bida. Asistènt trainer Yedidaya Maduro, ta wak ku satisfakshon bèk riba e eksperensiá durante e ultimo kampamentu. “Mi a partisipá pa promé bia i mi a siña hopi”, ela kompartí. “Mester duná e muchanan hopi atenshon, amor i mustra nan kiko ta òrdu I rèspèt”, ela kontinuá.
Milicent Rosa Djaoen | Potrèt: Deya Mensche
Tambe Ret Karibense a kòmbersá ku Zeshawn Rosario, kende a partisipá varios biaha na e kampamentunan. “Nos a siña trahá huntu i kon nos aktitut ta afektá e grupo”, Zeshawn a splika. Milicent Rosa Djaoen su yu hòmber i subrina tambe a partisipá na e kampamentu i ya ela ripara un diferensia den nan. “Nan ta mas rustig”, ela kompartí. “Mi ta konsehá majornan pa ta habri pa ayudo asina e mucha por haña e guia adekuá”, ela splika. “Ora bo entregué na hende ku no ta serka di dje, e por haña otro tipo di yudansa”, e mayor a finalisá.
Mayornan ku ke drenta den kontakto ku e fundashon pa inskribí nan yu, mester hasí un entrevista ku un neurosikólogo of mester bini ku un karta di unu akreditá promé ku inskribí e mucha, Sabat a splika. Tambe Sabat ke hasí un apelashon na esnan ku ke sostené e fundashon, dor di sponsor muchanan di menos rekurso, pa asina nan por partisipá na e kampamentunan.
Outor Deya Mensche