Alumnonan di mavo no ta haya cu e exigencianan di admision mas pisa, ta husto | Potrèt: Sharina Henriquez
ORANJESTAD – Dialuna awor e examen pa enseñansa avansa lo cuminsa. E biaha aki alumno di mavo cu kier sigui studia na havo, ta sinti mas presion.
Un di e dos scol di havo na Aruba, esta Colegio Arubano, a hisa su exigencianan pa admision. Esunnan cu a slaag pa mavo por ehempel, cu dos tien pa Hulandes y Ingles, y tres zeven y 1 acht pe otro vaknan, Colegio lo no accepta. Un grupo di alumno di Juliana School Mavo no ta haya esaki husto y a cuminsa un accion.
Un reportahe di Sharina Henriquez:
Codigo nacional
Un di e motibonan ta cu e exigencianan di Colegio ta mas stricto cu esunnan na Hulanda y Corsou. Scolnan di havo den e paisnan aki tambe kier a hisa nan normanan pa admision pa mavo. Pero gobierno a interveni y a yega na un solucion pa introduci un codigo nacional pa admision.
Rector Jossy Tromp ta haya cu ainda ta falta hopi na e scolnan di mavo pe alumnonan ta riba mesun nivel di esunnan di Colegio. Nan no ta asina exitoso compara cu e alumnonan cu for di comienso ta siguiendo havo na e scol aki. Pero cifranan concreto e no por duna. E rector ta sigui bisa cu Colegio a hisa e exigencianan tambe pa su mesun alumnonan, pues esunnan biniendo for di mavo no por keda atras tampoco.
Originalmente e plan tabata pa ya introduci e exigencianan stricto den e aña escolar vigente. Pero esaki a lanta asina hopi stof cu Colegio a dicidi di para e introduccion y a bini un comision cu representantenan di mavo, havo y gobierno pa evalua e asunto. Nan a traha un rapport cu yen di recomendacionnan. Finalmente Colegio no a cambia di idea y a sigui cu su plan di introduci normanan mas stricto. Pasobra a pone hopi riba papel, pero no por a mira un cambio, segun Tromp. E decision aki a sorprende e comision y tambe minister di Enseñansa, Michelle Winklaar completamente, como cu nan ta haya cu e ta contra palabracionnan haci.
Scol elite
Director suplente di Abraham de Veer School (mavo) Jane Hooft, tabata representa e scolnan di mavo publico den e comision menciona. E ta sinti cu admision pa scol mester ta den man di gobierno pa asina preveni e creacion di scol di elite na Aruba. Colegio Arubano no ta un scol publico pero si ta ricibi subsidio for di gobierno. Hooft ta haya tambe cu e scol a pone mucho enfasis riba e alumno so, mientrastanto e capacidad di docente tambe ta determina si un alumno ta haci bon na scol of no.
Minister Winklaar ta cambiando e ley na e momento aki pa asina haya mas autorisacion. Esaki lo nifica cu e mes, y no mas e scolnan, por bin cu regla di admision. E ta bisa cu lo keda envolvi e scolnan den e proceso di stipula regla. Den e caso cu mayoria di e scolnan kier baha e exigencianan pa havo, e lo sigui e direccion aki. Pero si tur esaki lo bin na tempo pe alumnonan di mavo aworaki por probecha, minister no por priminti e siman aki.
Autor Sharina Henriquez