Potrèt: Belkis Osepa
KRALENDIJK – Despues di algu mas ku mitar aña den akshon na porta di Bestuurskantoor, pidiendo pa bini un referèndem di struktura estatal, por sinti ku ainda e grupo aki tin hopi sosten pa e akshon aki. Asina por dedusí for di e reakshonnan ku a drenta riba e página di facebook di Extra, ku a pone e asuntu aki na diskushon.
Elekshon a pasa, dianan ta bai, i ainda e grupo di persona aki ta sintá na e sitio i hopi ta esnan ku ta puntra ta ku kua meta nan ta einan ainda, siendo e gobièrnu aktual a primintí ku lo bini referèndem.
Extra su ponensia riba facebook tabata: Boso ta haña ku ta nesesario pa e grupo aki sigui ku e protesta òf nan mester bai kas? “Nan bai kas i sinta warda mira ku si e gobièrnu aki sí ta kumpli ku lokual ku nan ta primintí.”
Otro hende ta reakshoná asina: “Hamas i nunka un luchadó ke se yama un luchadó ta terminá su lucha sin mira e loke e ta para pe bira realidat. Ami ta pidi Dios duna nan forsa i pasenshi i mi ta sostené nan den e lucha aki ku ta pa nos tur . Dios a bisa pa no sinta warda, sino aktua. Mi ta sostené boso den boso lucha pa hustisia. Tanten ku no tin hustisia, hamas i nunka mi por pensa di bisa nan bai kas. E lucha ta duru NKKB, pero hamas entregá. Muri riba pia i no biba na rudia. Ami lo bisa pa laga nan sigui protestá pa wak si gobièrnu ta kumpli ku lokual ku nan a primintí. Never give up!”
Mas reakshon: “Kada ken tin derecho di skohe su strategia. NKBB tambe tin e derecho aki i mi ta respetá esaki. Personalmente mi ta kere ku nan mester separá dos kos for di otro: esaki ta e lucha i e akshon. Sinta na porta di Ofisina di Gobièrnu ta djis un akshon. Por tin mas akshon pa kontribuí na e lucha. Ademas tur loke dura muchu largu ta bira monótono i ta pèrdè su efekto. Mester di mas kreatividat i variashon pa algu tin efekto.” Di akuerdo ku e persona aki, un área importante pa e grupo aki traha ariba ta nan vishon di e Boneiru ku nan ke bèk.
Esaki a bai pèrdí den e fasinashon ku referèndem. A lo ménos ami no sa kua esaki ta. E área aki ta hopi importante, pasobra na mi (humilde) opinion (personal), e grupo aki (i tur ku ta na fabor di referèndem) ta hasi un fout sumamente grave: esaki ta asumí di mes ku mayoria lo skohe pa e opshon ku nan ta faboresé. Kambio di un situashon pa otro, ta resultado di un proseso largu di konsientisashon i preparashon. I ta riba esaki tin ku traha.”
“Un otro pregunta ku mester kontestá, ta ken ta esun ku lo liderá e situashon nobo. Aruba tabatin su Betico Croes, Kòrsou su Helmin Wiels. Boneiru su Entidat Públiko tabatin su Ramonsito Booi. Ken ta esun ku ta bai hiba Boneiru na e situashon nobo? Mayoria ta skohe un hende ku nan por konfia. Mi no ta bisa ku Boneiru no tin un persona asina; mi ta bisa ku e persona aki no a profilá su mes ainda komo E Mozes aki pa Boneiru.”
Un otro persona ta di opinion: “No ta pasobra nan no a
lanta kima i destruí ta nifiká ku e ‘spiritu’ di e lucha a kaba. Kuantu hende lo bandoná nan famia, privasidat, libertat, traha pòrnada, risibí kritiká apsurdo, pa defendé un kousa un hecho ku nan a hòrta nos derecho di outo determinashon i a poderá e isla manera ‘karpata riba kachó!’ Awèl pa ami? Resa mi ta pidi na Dios pa nan haña e konklushon pa kaba.”
“Nan mester keda den akshon te dia ku referèndem pasa, sea kua sea e resultado. Anto konsientisá – segun mi nan ta hasi esei sufisiente talbes no na e manera ku hopi lo kier skucha òf na e manera ku nan lo preferá di risibí informashon. Pero ku nan ta hasié ta sigur.”
Otro hende ta skirbi: “Bai kas, stòp di hasi ridikules.” Di otro bende tin hende ta skirbi: “Nan keda ‘strong’ te dia nos haña referèndem! Hustamente ta pasobra a bisa ku e ta bai bin no kier men ku e lo pasa! Nos tur sa kon polítiko ta traha!
Anto otro lesadó di Extra ta mustra ku “sòldá ku retirá òf bandoná tereno di bataya…..ta pèrdè. Nèt awor ku a primintí ku lo bin ku referèndem mester para pa wak kiko ta e resultado.” Otro persona: “Nan a frakasá, pasombra NKBB a bisa nan ke referèndem promé ku elekshon. Loke ku Extra
mester hasi ta di duna un plakat na e hòmber ku a frakasá, meskos ku Extra a dun’é un plakat di e hòmber di aña.”
“Frakasá? Laga loko, laga kèns. Den historia na Boneiru ni Michael Bijkerk no a keda ku tantu rosea manera nan. Biba James Finies biba Kevin Thode. E mucha hòmber a mira, tende, sera konosí i dialogá.”
Fuente Èxtra Boneiru