Pa promé bes Aruba ta pais wéspet di e konferensha regional di refugiado – potrèt: Sharina Henriquez
ORANJESTAD – Na e konferensha di e organisashon di refugiado di Nashonnan Uní (NU) ku e region karibense, Aruba i Kòrsou a pidi atenshon pa e situashon na Venezuela.
“Venezuela por bira un segundo Cuba”, Henk Stomp di Krus Kòrá di Kòrsou ta bisa. E ta haña ku mester hasi algu, manera train hende. Mester wak for di awor unda i kon mester regla akohida si un fluho grandi di refugiado yega for di e pais suramerikano.
Te ainda solamente tin un fluho ku ta oumentá di venesolano riku ku ta bin kumpra kos na Kòrsou i Aruba ku nan no por haña den nan mes pais. Pero si e situashon eskalá, Stomp ta bisa, e hendenan aki por bira refugiado óf buskadó di asilo.
E persona di rango di mas haltu di UNHCR pa e region karibense, Buti Kale, ta bisa ku djaluna el a papia ku representante di gobièrnu arubano tokante e manera kon e organisashon di refugiado por duna asistensia. No solamente ku un plan sino tambe ku training pa situashon manera por ehèmpel esun di Venezuela.
Ta promé be ku Aruba tabata e pais wéspet i pesei ta promé minister lo a habri e konferensha. Ora e i minister di Imigrashon Benny Sevinger tur dos a haña nan strobá, ta trahadó den maneho i presidente di e komishon di asilo arubano Alfred Sneek di e organisashon di atmishon Dimas, a habri e konferensha.
E ta bisa ku Aruba ta konsiente di e situashon na Venezuela i ta vigilá esaki, pero ku no tin masha preparashon. No tin mas tantu petishon pa pèrmit di estadia tampoko. Ademas último añanan Aruba a haña solamente binti petishon di asilo for di Colombia, Sürnam i Venezuela.
Foro nobo
Na e konferensha a papia tambe di formashon di un foro, kaminda teritorio i pais den Karibe por kompartí eksperiensha i solushon ku aktualmente no ta presente den relashonnan eksistente manera por ehèmpel Caricom. E tópikonan por ta mas amplio ku e problemasia di hende ku ta hui pa guera òf persekushon. Por trata di hende tambe ku pa otro motibu ta hui òf emigrá. Manera si nan hui pa motibu di efektonan di klima.
Michel La Haye di Krus Kòrá Aruba ta bisa ku por ta difísil pa distinguí si un hende na un dado momentu ta hui pa skapa su bida òf pa haña un mihó bida.
Haiti
Manera den e kaso di refugiado haitiano despues di e temblor sinku aña pasá. Na e islanan Turks & Caicos tur siman ta yega asina tantu refugiado ku boto ku nan a para bira e grupo di mas grandi di pueblo. Gail Caesar di Krus Kòrá djeinan ta bisa ku gobièrnu ta keda repatriá, pero ku esaki no ta yuda i espesialmente ta kosta hopi plaka. E ta spera di haña un solushon den relashon karibense.
Outor Sharine Henriquez