Untitled

KRALENDIJK – Siudadano Michael Gaynor ta reta gobièrnu di Boneiru pa promé di yüni, aserká Arugas i pidi e kompania aki un oferta pa solushoná e problema di gas. Pa e fecha aki Gaynor ta spera ku sinku mil persona lo a firma un petishon pa laga gobièrnu sa ku e votadónan ku a pone nan na poder, no ta bai sinta ketu pa loke ta trata e mal servisio ku nan ta hañando aktualmente.

E no ta kere ku Curoil por garantisá ningun solushon pa Boneiru , Gaynor: “Ami ta un di e hopi siudadanonan desabilitá ku ta biba na Boneiru. Hopi hende konosé mi riba mi skut mobil ta purba desviá buraku, i mi ta pidi despensa, blòkiando tráfiko. Mi mester di un bòter di gas chikitu. Pa mas ku dos luna kaba mi ta sin gas. Mi a pidi Curoil pa kumpra un bòter èkstra, i nan a bisa mi ku esaki no ta posibel. Ta ki tipo di servisio esaki ta?”

Tokante su reto na gobièrnu, Gaynor no tin masha konfiansa den de e departamentunan di DROB i DEZA pa regla e pèrmit. Gaynor: “Nos tur sa kon inefisiente DROB i DEZA ta. Suèrtè ora ta bai dil kunan. Mester a remplasá e funshonarionan hopi aña pasá pa hendenan ku ta interesá den mira nos bai dilanti i prosperá.”

Gaynor ta agregá: “Mi ta kòrda tempu ku a pone gerensia di WEB responsabel tempu a kita koriente. Dikon no hasi esaki ku gerensia di Curoil?” Akshon di firma Pa loke a trata su akshon firma, Gaynor ta bisa ku e siudadano di 97 aña, Sandra Salomons, ta un di e proménan pa firma esaki. Salomons ta biba na Hato i ta sostené e derecho di siudadanonan lokal pa tin akseso kontinuo di gas pa kushiná kuminda salú i nutritivo.

E akshon di firma ta pa pone preshon riba gobièrnu lokal pa tuma akshon inmediato pa solushoná e problema króniko di gas. Intenshon ta pa alkansá sinku mil firma ku lo presentá na gobièrnu. Gaynor ta hasi un petishon na tur hende pa sostené e akshon aki.

Fuente Èxtra Boneiru