ORANJESTAD – E sekura ku no tin fin pa kaba na Sint Eustatius a kousa un skarsedat di awa di kranchi. Djasabra e uso di awa tabata di tal manera ku kompania di energia STUCO no por a entregá awa mas, loke ku a pone ku e ret di awa no tabatin sufisiente preshon mas.
E falta di preshon a pone ku kasi niun hende no tabatin awa di kranchi mas, ku eksepshon di Lower Town ku ta keda mas abou. Hopi habitante di e isla ta usa ‘cisterns’, esta rembak, pa kolektá aw’e yobe. Pero tin hopi luna ku apénas awa a kai i e sekura ta kaba ku tur Statia su reservanan di awa. P’esei tin mas nesesidat di awa di pipa.
Tur ku tin
Stuko su fábrika di awa, kaminda ta produsí awa di bebe for di awa di laman desaliná, ta traha tur ku tin pa trese produkshon na e nivel deseá. Segun un bosero e preshon di awa na mayoria lugá a subi sufisientemente. “Mi ta spera ku e suministrashon di awa pa nos klientenan lo drecha djárason. Djabièrnè e entrega di awa lo mester ta kompletamente normal atrobe”, asina e bosero a laga sa.
Despensa
E kompania di energia a pidi despensa, pero e eskarses temporario di awa no a kousa problema grandi. Skolnan por a keda habri , pasobra nan tambe ta usa rembak ketu bai.
Statia su promé kompania di energia independiente STUCO a kuminsá traha dia promé di yanüari 2014. Te den kurso di aña pasá numa e isla por a disponé di un ret di awa di pipa, ku ta konsistí di dos stashon di pòmp, 28 kilometer di pipa i mas o ménos mil konekshon. A finansá e instalashon ku plaka di supsidio hulandes. Prome ku esei Stasianonan, banda di rembak, mester a usa awa di trùk pa por haña awa di bebe.
Outor John van Kerkhof