D.r.p.d: Veronica Benjamin, Cassandra Gibbs i Antonia Hodge | Potrèt: Today/ Hilbert Haar
PHILIPSBURG – “Si un hende tin tres yu kaba den orfanato anto un di kuater yu ta na kaminda, mester tuma medida médiko pa e no por haña mas yu. Tin muhe aki ku tin diesdos yu; no ta tur ta den orfanato, pero ta otro hende ta kria nan. Esaki no mester t’asina.”
Ku e gritu di alarm aki Veronica Benjamin di e orfanato New Start ta toka un di e hopi puntonan malu den un sistema ku ta purba tur loke nan por pa duna mucha ku no tin niun sorto di chèns den bida un kaminda seif pa keda.
Segun voogdijraad tin 88 mucha ku ta keda na un sitio protehá ku korte a imponé. 34 di nan ta biba na kas, shete ta adoptá i 47 ta den orfanato kaminda dies mucha ta kedando ei informalmente pasobra nan mayornan no por kuida nan.
E plaka no ta yega
E famianan adoptivo ta haña 250 florin pa luna di gobièrnu i e orfanatonan ta haña 500 pa mucha pa luna. Esakai no ta yega, Cassandra Gibbs di e orfanato ‘I Can’ ta bisa. “Dies aña pasá ta delaster bes ku a subi e plaka di 275 pa 500 florin. Ami ta konsiderá 2000 florin un suma rasonabel.”
E orfanatonan na febrüari di aña pasa a papia ku minister di Hustisia Dennis Richardson, pero for di e dia ei nan no a tende nada mas di e kosnan ku a primintí nan e tempu ei. Gastunan pa kuido último kuater añanan a subi te mas ku 343 mil florin pa aña.
E fondo di desaroyo SMDF, ku a tuma e tarea ofer di Usona ku no ta eksistí mas, ta sostené orfanato ku kubrimentu di gastu di plaka i skol i uniform di skol. Ministerio di Hustisia ta paga e gastunan médiko. Antonia Hodge di Hope Outreach ta bisa ku pa sierto mucha ainda ta un problema pa kubri e gastunan aki.
Muchu hóben
Benjamin ta trese un otro problema dilanti. Asina un huèrfano hasi diesocho aña e mester sali for di kuido i para riba su mes pia. “Mi tin un mucha muhé di diesocho aña ku no tin niun kaminda di bai. Nos mester hasi algu.” Segun Cassandra Gibbs diesocho aña ta muchu hóben pa laga mucha bai riba nan mes den komunidat. Na Gran Bretaña nan a kambia esaki. Ei un huèrfano ta keda den e sistema te dia e hasi 21 aña.”
Mayor ku no ta funshoná
Gibbs ta bisa ku mayoria parti ta kasi imposibel pa establesé un relashon ku e mayornan biológiko of famia di e muchanan. E atenshon di instanshanan ofishal tampoko no ta djaki te aya. “Dos luna pasá polis a trese un mucha seka mi. Reclassering i Voogdijraad no a bin wak ni un be kon ta ku e mucha.”
Gibbs ta bisa ku e mayornan mester tuma nan responsabilidat. “Mucha mester di nan mayornan, maske kuantu kuido nos duna. Na un sierto edat nan ta bai buska nan mayornan; nos mester pone e bienestar di e muchanan aki sentral. Bo no por djis kita mucha for di nan mayornan.
Gibbs ta bisa ku mester evaluá e sirkunstanshanan bou di kua e famianan di e muchanan aki ta biba. “Mayor ku no ta funshoná ta e motibu prinsipal ku mester pone mucha den orfanato.”
Agènda polítiko
E parlamentario Sarah Wescot-Williams ta haña ku gobièrnu mester pone famia i yu te ariba di nan agènda polítiko. “Kuido ta parti di un problema mas grandi den komunidat. Pa hèndel djis un frakshon di e problema aki ya kaba lo kousa masha prekupashon.”
Otro parlamentario manera Leona Marlin-Romeo i George Pantophlet ta bisa ku e problema di kuido di mucha ta falta di imigrashon sin kòntròl. “Tin mucha ku ta registrá na e banda franses di e isla pa kobra onderstant anto nan ta den un orfanato aki”, Marlin-Romeo ta bisa. “Nos mester sera e buraku ei.” Otro luna tin palabrashon entre e delegashonnan polítiko di e parti hulandes i e parti franses di e isla. Ei e parlamentario Lloyd Richardson ke plantiá e abusu di e sistema sosial aki.
Outor Hilbert Haar