E tereno na Nieuwe Haven ta kuminsá yena ku seru di saku yen di bòter di plèstik – potrèt: Anneke Polak
WILLEMSTAD – Asina Timo Brouwer di e kompania di resiklahe Green Force habri e kònteiner di resiklahe na supermerkado e bòternan bashi di plèstik ta lora sali mésora. E bakinan pa plèstik bèrdè, blou i transparente ta yen yen. Ta kolektá si pero no ta resiklá.
Brouwer ta hopi frustrá pasobra porfin luna pasá el a risibí e mashin tan sperá pa kòrta plèstik na pida pida for di China. E mashin a kosta 6 mil dòler. Un invershon pòrnada pasobra a resultá ku e mashin no ta prosesá shen kilo di plèstik pa ora sino diessinku kilo so.
“Ora mi send’é mi ta mira mi plaka disparsé den dje. El a traha dies ora so. E mashin mas grandi ta kosta binti mil dòler, i mas tres mil dòler pa transporte, impuesto di importashon i O.B. Mi no tin e plaka ei i gobièrnu no ta hasi nada. Si nan tabata hasi nan trabou, lo no tabatin mester di mi.”
Tereno ta yena
Entretantu e serunan di plèstik ta krese. Brouwer ta hiba saku yen di plèstik di e kònteiner di resikláhe pa un tereno serka di e lago di asfalt na Nieuwe Haven. Ei e serunan di saku ta yega te na e kaminda di pasa, aki un par di dia e tereno ta yena. Mi tin un deposito mas na Veeris, kaminda tin trinta mil kilo di bòter di plèstik ta warda pa kòrta nan na repi repi. Na un dado momento tur lugá a yena anto a kaba.”
Preis abou di zeta
Pero es ku kere ku e serunan di plèstik aki un dia lo bira seru di oro ta haña daks. Tempu ku Brouwer a kuminsá kolektá plèstik na aña 2012 mil kilo di plèstik tabata generá kuater shen dòler. Entretantu e preis ei a baha bai shen dòler. “Esei ta diesshete sèn pa kilo, anto e ora ei mi ta papia di florin. Pa esaki bo mester a garna setenta bòter di plèstik. Di e diesshete sèn aki mester paga tur gastu di produkshon. Preis di plèstik ta relatá na preis di zeta. Preis di plèstik resiklá ta baha pa evitá ku ta traha plèstik nobo di zeta.”
Ku e preis di zeta abou ku tin awendia resiklahe no ta bon negoshi i e kompanianan di resiklahe ta stòp, i esaki lo ta dañino pa medio ambiente. “Ami ta un di e poko hendenan den region ku ta eksportá fòil di plèstik.
Fòil di plèstik
E siman ku ta bini 20 mil kilo di fòil di plèstik plèchá lo bai Hong Kong. Ta importadó a kolektá e plèstik aki pasobra nan tambe ta partisipá na resiklahe. Kaminda Brouwer na 2010, ora ku koutelosamente el a kuminsá ku su plannan pa resiklahe, tabata kolektá sesenta kilo so na bleki di aluminio awor e tin kuater mil kilo di bòter di plèstik, fòil, bleki di aluminio i bateria pa luna. “Dos te tres mil kilo di fòil, mil dosshen pa mil kuatershen kilo di bòter di plèstik i sinku shen kilo na bleki di aluminio. E blekinan mi ta bende ku e resikladónan di metal riba e isla pasobra un mashin pa plècha e blekinan ta karu. Mucho poko hende ta kolektá e blekinan ei.”
Green Force tin un trahadó parttime ku ta plècha e fòil di plèstik. Brouwer mes ta buska e sakunan ku plèstik na e sitionan di kolekshon i e importadónan. Seis dia pa siman e ta kolektá ounke ku e tin miedu ku pronto e delaster pida tereno lo ta yen yen. E no ta generá plaka. “Mi mester asta pone sèn ariba. Mi tin un kompania di seguridat ku mi por biba di dje anto ta kuné mi ta supsidiá Green Force. Tanten mi tin un défisit di 25 mil dòler si.”
Outor Anneke Polak