WILLEMSTAD – Tur aña sentenar di stazjèr ta bula bini Kòrsou for di Hulanda pa kore e stazje di nan soño. Ofisialmente ta mandatorio pa regla un ‘Verklaring van Rechtswege’ pa un stazje asina. Pasobra hende di nashonalidat hulandes ku no a nase na Kòrsou por biba i traha na Kòrsou; nan no tin mester di pèrmit di estadia òf di trabou, pero sí un asina yamá Verklaring van Rechtswege. Kasi niun hende no ta buska esaki. Luganan di stazje kasi nunka no ta pidi e deklarashon ei. Servisio di Imigrashon tampoko kasi nunka no ta puntra p’e, pero esei ta bai kambia awor.
Pasobra tin hopi stazjèr ku ta keda na Kòrsou ‘ilegalmente’ no tin sifra di e kantidat di koredó di stazje na Kòrsou. Tantu Imigrashon komo Centraal Bureau voor Statistiek no tin un idea: “Nos no tin sifra di e kantidat di stazjèr na Kòrsou”, segun un trahadó di CBS. Algun stazjèr ta drenta via ofisinanan di stazje, pero mayoria ta bini riba nan mes. No tin registrashon mes di nan. Ta pesei ta masha difisil pa konta ta kuantu tin òf asta hasi un estimashon.”
Wereldstage, e ofisina di stazje di mas grandi di Kòrsou sí tin un estimashon. Maarten de Jong, direktor di Wereldstage ta bisa: “Tur aña tin mas o ménos 900 stazjèr hulandes ta bini Kòrsou. Mi ta kere ku un seis- pa sheteshen tin tur kos reglá. Ke men mayoria tin e Verklaring van Rechtswege. Si aworakí bo bai un bario di studiante i entrevista tur studiante bo ta bin haña sa ku nan tur tin e deklarashon. Tur. Sin eksepshon.”
Otro sifra
Imigrashon tin sifra ku ta sali diferente. “Na 2014 un total di 300 stazjèr a bin mèldu seka nos”, Saresca Nicolas di Imigrashon ta bisa. “Mi ta bisa ‘bin mèldu’ pasobra nos tambe sa ku no ta tur ta entregá un petishon. Ta pesei pronto nos ta bai kontrolá mas mihó. Si kontra ku un stazjèr na trabou sin Verklaring van Rechtswege òf un petishon p’esaki, esaki por tin konsekuensha.. Por duna un but pero mas parti e kompania i e stazjèr ta haña un atmonishon.”
Ta kosta plaka
Un di e motibunan ku stazjèr no ta pidi e deklarashon ta pasobra e ta kosta plaka. Pa pidi un Verklaring van Rechtswege ta kosta 527.50 florin. Nan ta pidi e stazjèr diferente dokumento ku mester a buska for di na Hulanda kaba. I pa algun di e dokumentonan aki, manera un VOG (Verklaring Omtrent Gedrag) tambe mester paga.
No tin nodi
Un otro motibu pa keda sin pidi e deklarashon ta ku e kompanianan ku ta ofresé stazje no ta pidi e deklarashon karu tur ora. Sabine tin diesocho aña i e ta kore stazje na un lugá di akohida di mucha: “Mi a regla tur kos kaba for di kas pa por pidi un Verklaring van Rechtswege. Ora m’a topa mi supervisor di stazje mesora el a bisa ku bon mira e no ta haña ku ta nesesario E di: ‘Ta kosta bo hopi plaka i niun hende nunka no ta puntra p’e ke men si ta na mi bo no tin nodi di busk’é.’ E ora ei m’a disidí di laga e kos asina.”
Outor Sarah Joosten