Superando ku Levi Silvanie 119

Superando ku Levi Silvanie – Potrèt: Deya Mensche

WILLEMSTAD – Ayera anochi Teater Luna Blou a keda transformá den un sala di inspirashon unda Levi Silvanie i su banda a deleita e públiko ku músika i un mensahe poderoso. E sala tabata kompletamente yen, i esnan presente a eksperensiá un konsierto dokumental.

Aki Silvanie, di 27 aña, a konta via músika i proyekshon multivisual, kon pueblo di Kòrsou por supera tur obstákulo, n’e obstante ke kere den su mes i kere den otro. Tambe a anunsiá ku e movementu Superando ke sostené varios fundashon i organisashon ku ta boga pa adelanto di nos komunidat.

Deliberadamente a tene e tarima skur i a poné e lus riba e públiko, pa ilustra na e públiko ku iluminashon ta bini di nan mes. Durante e proyekshon, a bin na palabra, entre otro, e konosido reportero Yves Cooper, rumannan Stroop, i kosturero i diseñado Junius Isenia, kende tur a kompartí nan vishon pa Kòrsou i kon nan ta supera retonan den bida. Komo inspirashon di e tema, Alton Paas tambe a duna un bunita diskurso durante e show, unda ela kompartí kon tur dia e mester kondishoná su mente pa e supera su desabilidat físiko i kon e echo ku e tin bida, ta dun’e propósito.

Despues di e show di 90 minüt, e presentashon a kontinuá riba e patio pafó, unda Silvanie a konta e públiko varios anékdota personal i a ekspresá su gratitut na esnan presente. Tambe Ret Karibense a kòmbersá ku John Leerdam, kende tabata partí di e públiko i a ekspresá su sintimentunan pa ku e evento. “Superando a inspira mi i duna mi speransa pa mira kon hóbennan yu di Kòrsou ta produsí algu asina”, ela kompartí. “Ami mes a supera kanser di wesu 20 aña pasa, pues mi por a identifiká ku e mensahe”, e konosido polítiko i sineasta a kompartí.

Yves Cooper tambe a indiká ku e echo ku e por a forma partí di e movementu akí, a trese un transformashon den su pensamentu riba e futuro di Kòrsou. “Mi mester a ahustá mi pensamentu pesimista, mirando ku tin hóbennan manera Levi ku ta mobilisando”, ela kompartí. “Lamentablemente nos no por prevení ku Kòrsou lo kai den abismo promé ku bin kambio”, ela konkluí.

Rumannan ohochi Stroop, e duo konosí pa nan komentario humorístiko Oompie Stroopie, tambe a motiva dor di nan partisipashon. “E esensia mas importante di e anochi tabata pa trese un mensahe pa e públiko, pues e enfoke no tabata riba Levi”, según Quinton Stroop. “Nos a usa Levi su músika, eksperensianan di Andy Kirchner i Alton Paas, i tambe imagen di video pa trese e mensahe.”, Quenton Stroop a añadi. “Bo no ta bini pa e artista, bo ta bini pa mensahe ku ta duna bo èkstra energia pa finalmente bo por supera”, nan a finalisá.

Levi Silvanie mes no por a skonde su satisfakshon, i apesar ku su stèm inisialmente no tabata den e mihó kondishon, niun hende por a ripara esaki na su presentashon. Ela kaná saka potrèt i kòmbersá ku tur hende i gradisí henter su tim pa nan sosten.

E anochi a konkluí ku e oportunidat pa kumpra artesania manera T-shirt, lampi i demas artefakto pa sostené varios organisashon i fundashon na Kòrsou.

Outor: Deya Mensche