Tiroteo na Hato: likidashon a hasí hopi daño na Kòrsou – Potrét: Anneke Polak
WILLEMSTAD – Djaweps a trata e kaso di e promé dos sospechosonan den e kaso di tiroteo sensashonal na airopuerto Hato ku a tuma lugá riba 15 di yüli, 2014. Givency Maria, representa pa abogado Blonk, i Renaldo Martina, representa pa abogado Johannes, a aparesé dilanti hues van Dam van Isselt, pa duna kuenta i rason pa nan papel den e likidashon ku a shòk nos komunidat.
E akusadonan lo a forma partí di un guera entre e gengnan No Limit Soldiers i Buena Vista City, ku ya a kosta bida di 16 persona. Riba e dia en kestion, a keda asesina ‘Jais’ Juliana i Shantley Arnhem i tabatin numeroso víktima ku a haña nan mei mei di e áwaseru di bala.
Hues van Dam van Isselt a kuestioná Maria i Martina i a indiká ku mester tabatin un plan ya ku nan tur dos tabata den outo. Inisialmente Martina a deklará ku e tabata sa ku su amigunan lo kièr a regla kuenta ku Jais, pero den korte ela splika e no tabata sa di nada. Según Martina, ta despues polis lo a bise ku ta Jais a keda asesina. Tambe Martina a indiká di a risibí sèn pa keda ketu despues di e tiroteo, pero e no kièr a bisa di ken ni kuantu e montante tabata.
Tambe a trata e sirkunstansianan personal di sospechosonan, unda rapòrtnan sikológiko a indiká ku ambos ta kompetente i responsabel pa nan aktonan. Sinembargo, den e kaso di Martina, su abogado a pidi pa tene kuenta ku a sali na kla ku e no por resistí e preshon di grupo i ta fásilmente influensia pa otro. Maria su abogado a indiká ku su disernimentu hopi biaha ta keda afektá negativamente pa e echo ku e tin problema ku uso di droga i ke buska yudansa.
Tambe hues van Dam van Isselt a konsiderá e impakto grandi ku e kaso akí tabatin riba nos komunidat i tambe e víktimanan. Yudansa pa víktima, kende a representa ocho víktima ku a sufri daño físiko i mental, a lesa e demandanan monetario, kual a varia di un par di mil florin pa kasi mei ton.
Despues di e pausa di mèrdia, Fiskal Rip a presentá su rekisitorio. Aunke Maria i Martina no ta esnan ku a tirá, tòg fiskal Rip ta keda mirá nan komo kómplise pa echonan kastigabel. Tambe Rip ta tilda e sospechosonan di a fasilitá e pistoleronan pa hasí nan trabou pasobra nan a fungi komo respaldo. Tambe Rip a indiká kon e likidashon den sanger frui akí a hasí hopi daño na Kòrsou komo destinashon turístiko.
Pa motibu ku Maria i Martina a kooperá, ministerio públiko por a persiguí e pistoleronan di e asesinato, pero ta haña ku e demanda di 20 pa 24 aña ta na su lugá. Konsekuentemente, fiskal Rip ta pidi solamente 12 aña, i asina kièr manda un señal pa e otro sospechosonan.
Abogado Alicia Blonk a indiká ku Maria no a keda paga pa partisipashon den e asesinato riba ‘Jais’ Juliana. “E 10.000 florin ku e tabatin den su poseshon a bini di un benta di un bròmer”. Tambe Blonk a pidi pa tene kuenta ku e sirkunstansianan inhumano ku Maria a soporta durante aresto preventivo na Barber. “Maria mester a drumi sunú paso tabatin miedu pa e kometé suisidio, pero ta hopi friu na Barber i esaki ta kai bou di tortura”, e abogado a deklará.
Abogado Johannes na su lugá a enfatisá ku e rol di Martina den e tiroteo na Hato tabata unu hopi pasivo. “Ela sinta mira kiko a pasa su dilanti”, e abogado a deklará. Ministerio públiko ta keda di opinion ku e sospechosonan konsientemente a forma partí di e eskuadron di morto ku a bai Hato.
Mayan lo tin tratamentu integral di e demas sospechosonan den e kaso Hato, kende ta Judrin Martis, representa pa abogado Vaders, Raily Bart, representa pa abogado Janssen i Adrian Martha, representa pa abogado Martis.
Outor: Deya Mensche