WILLEMSTAD- E di dos dia di e kaso Hato tabata unu largu i emoshonal. Judrin Martis, representa pa abogado Vaders, Raily Bart, representa pa abogado Janssen i Adrian Martha, representa pa abogado Martis, tambe a aparesé dilanti hues van Dam van Isselt, pa duna kuenta i rason pa nan rol den e likidashon di ‘Jais’ Juliana i Shantley Arnhem, dia 15 di yüli ultimo.
Según Ministerio Públiko, Martis i Martha lo tabata e pistoleronan i Bart lo a fungi komo shofùr. Fo’i e komienso, e kaso a pinta di ta unu kompliká, sigur ora Vaders i Janssen a pidi pa mas tempu pa hasí investigashon adishonal i tende mas testigu. Finalmente hues a opta pa no para e kaso i tòg trata esaki awe, unda dia 18 di yüni próksimo, e lo pronunsiá un veredikto final of unu intermediario.
Durante e defensa di abogado Janssen, esaki a alega ku Ministerio Públiko a sera dil ku Maria, Martina i testigu Fenix, kende inisialmente tambe tabata un sospechoso, pa kastigu redusí of inmunidat. “Sospechoso Maria a keda ketu te ku 25 di òktober, despues diripiente ela deklará”, Janssen a konkluí.
Siguientemente, Janssen a mustra un potrèt di e kas di testigu Fenix, unda e sospechosonan lo a reuní i despues e ta mustra e imágennan di video di e tiroteo na Hato. Riba un pantaya chikí, ku no tabata muchu visibel pa e públiko presente, e abogado a splika e diskrepansia nan den e deklarashonnan i loke e video lo a mustra. Abogado Vaders tambe ke hasí mas prueba adishonal di DNA i ke inkluí e potrètnan den e rapòrt, pa asina aberiguá si e deklarashonnan inkriminatorio ta berdat.
Fiskal Rip na su lugá a ninga di a trahá dil ku e sospechosonan. Hues a puntra sospechosonan kiko nan kièr a añadi, unda Bart i Martis a indiká ku nan ke pa e petishon nan di investigashon keda honra. “E hendenan akí ta set di gañadó, mi no tabata na aeropuerto i nan ta tira tur falta riba mi”, un Martis emoshoná a deklará.
Despues di e pausa di mèrdia, fiskal Hato – Willems a tene su rekisitorio i ta ripití e deklarashonnan di Maria i Martina. Na su turno, sospechoso Martis a splika ku ora e tiroteo tabata tuma lugá, e tabata kome serka Kenchi, banda di Cabana Beach. Niun hende por a konfirmá su vershon i Martina ta kontradesí esaki. Sospechoso Martha na su turno, lo tabata na kas ta wak televishon ku su frei ku tabata na estado.
Fiskal Rip ta deklará ku e petishon di inatmisibilidat di e abogadonan Vaders i Janssen ta infunda. “Argumentonan di defensa ta basá riba algu ku no ta eksistí, está un dil ku e demas sospechosonan”, Rip a splika.
Finalmente Martha, Martis i Bart a haña e ultimo palabra unda nan tur a enfatisá nan inosensia. “Mi tabata na kas”, Martha a ripití. Bart su deklarashon final tabata simpel, “m’a bisa kaba ku mi tabata na The Movies”.
Martis a deklará emoshoná ku “ta parse ku mi ta spiritu, paso según e deklarashonnan, m’a keda señala na Fuik. Sicópata nan ta”. “Mi no tin nada kontra kastigu di bida largu, e ta pas pa e tipo di krímen akí. Pero no ora bo ta inosente, no ta wega! Mi tin famia, yunan di kria, i mi ta hopi rabiá”, Martis a finalisá ku lagrima na wowo.
Outor: Deya Mensche