30 di Mei 1969 – Potrèt: kolekshon di Stanley Brown
WILLEMSTAD – Si promé ku 30 di mei 1969 tabatin hopi abuso laboral ta tuma lugá, despues di e fecha aki e situashon a drecha temporalmente pero gradualmente e situashon di inhustisia laboral a bolbe lanta kabes. Esaki no opstante tur e leinan laboral ku a bini na vigor despues di 30 di mei. Asina eks sindikalista Roque Koeijers ta konkluí.
Eks sindikalista Ricardo Isebia ku tabata forma parti di e direktiva di PWFC na 1969 i eks minister di Labor Rufus McWilliam ta koinsidí ku e lucha di 30 di mei no a trese masha kambio riba e tereno laboral. E kambio di mas visibel ku a tuma lugá ta ku hendenan di koló a kuminsá haña mas rekonosementu i por a okupá puestonan haltu den gobièrnu. McWilliam ta kontentu ku e logro aki pero ta haña ku nos a faya dor di no a tene sufisientemente kuenta ku e parti di kapasidat di un persona pa por okupá sierto funshon.
Un reportahe di José Manuel Dias
Komo abogado spesialisá riba tereno di labor Koeijers a konstatá ku aktualmente ta eksistí e mesun kondishonnan ku a kondusí na e lantamentu ku a tuma lugá 30 di mei 1969. “Basa riba esaki ami si ta kere ku lo bini un revolushon, mi ta sintié”, Koeijers a pronostiká. Ricardo Isebia huntu ku Roque Koeijers ta un di e poko sindikalistanan protagonista di e marcha di protesta di 30 di mei ku te ainda ta na bida.
Por a evitá
Isebia ta kulpa gobièrnu di e tempu ei liderá pa Ciro Kroon di partido Demokraat pa tur e destrukshonnan ku a tuma lugá den nos sentro di siudat. Segun Isebia gobièrnu a faya barbaramente dor di no a dekretá un periodo di fria kabes na momentu ku e negosiashonnan entre Shell i e sindikatonan a yega na un impase i kaminda por a premirá ku kos lo a sali for di man. “Si gobièrnu lo a dekretá un periodo di fria kabes lo por a evitá tur e disturbionan di 30 di mei” Isebia ta enfatisá.
Outor: José Manuel Dias