WILLEMSTAD: 30 di mei, 1969, ta un fechá memorabel pa hopi siudadano na Kòrsou. Hopi ta kòrda unda nan tabata, i por deskribí e atmosfera di tenshon ku tabata reina rònt di e akontesimentunan. Pero ora Ret Karibense a subi kayanan di Punda i a kòmbersá ku hóbennan di diferente edat i antesedente, e konosementu riba e echonan di un wèlga ku a marka historia Kurasoleño signifikantemente, tabata mínimal te ku no eksistente.
30 di mei en breve
Na mei 1969, un disputa laboral entre PWFC, CFW i Werkspoor (supkontratista di Shell) tabata andando pasobra Werkspoor tabata paga su trahadónan menos sèn ku loke trahadónan hulandes, ku tabata hasí mes un trabou, tabata gana. E negosiashonnan entre sindikato i gerensia di Werkspoor a stanka i 400 trahadó di e kontratista a kuminsá wèlga. 29 di Mei, PWFC, CFW, en solidaridat ku e trahadónan, a anunsiá un wèlga general, i riba 30 di Mei aproksimadamente 3 pa 4 mil trahadó a reuní dilanti post 5 di Shell. Nan tabata akusá gobièrnu tabata kómplise den tenementu di e salarionan abou i un grupo a disidí di marcha pa Fort Amsterdam.
Na kaminda nan malkontentu a eskala riba un manera hororoso. Durante e marcha e wèlgado nan a kuminsá plènder i kima negoshinan ku tabata propiedat di hende blanku. Na final, dos persona a pèrdè nan bida, señores A. Gutiérrez i A. Doran, i Papa Godett a haña bala den su lomba.
Tambe 22 polis i 57 demas persona a keda herida, i 322 persona a keda arestá. E daño material tambe tabata signifikante, unda total 43 negoshi i 10 edifisio a keda destruí i 190 edifisio a keda sakiá. Ta kálkula ku e wèlga a kousá aproksimadamente 40 mion doler di daño. Si mester bisa ku 30 di mei a logra trese igualdat salarial pa e trahadónan di Shell i a bini elekshonnan nobo.
E hóbennan
Mester bisa ku e hóbennan ku Ret Karibense a papia ku n’e den Punda, a mustra interes den e suseso. Tur a indiká ku nan ke sa mas di e wèlga, i tin a hañ’e na skol, pero tur a duna informashon robes of inkompleto. “Nos no a bai detayadamente den e suseso, i e ta partí di nos historia, pues mi ke sa mas di dje”, un damita a kompartí.
Sonaima Jonis, dosente na Kolegio Alejandro Paula, antes PSC, a duna di konosé ku na su instituto sekundario si 30 di Mei ta keda trata ampliamente. “Di segunda grado ku klas di examen e materia ta keda trata durante les di historia, pues ta trata hóbennan entre 13 te ku 17 pa 18 aña”, ela sigurá.
Porta un di e motibunan ku e suseso ta keda trata komo un detaye mínimal den e kuríkulo, ta ku ainda nos gobièrnu no a rekonosé e suseso akí komo un dia konmemorativo, ya ku esaki ta un tópiko delikado pa sierto miembronan prominente den nos komunidat.
Outor Deya Mensche