Potrèt: Deya Mensche

Potrèt: Deya Mensche

WILLEMSTAD – Apesar ku turismo for di Venezuela a krese exponensialmente durante e delaster 5 aña, na luna di aprel, gobierno benesolano atrobe a baha e kupo di turista pa destinashonnan manera Kòrsou. Pa basta tempu kaba, ta solamente bankonan di gobièrnu por emití dòler merikano pa biaha pa eksterior. Ku e medidanan nobo, un turista benesolano awó por ‘swipe’ 1500 doler merikano pa aña i por lanta solamente 300 dòler merikano kèsh.

Esaki a kreá un situashon hopi fèrfelu, kual ya ta impaktando e fluho di turista benesolano, kual na 2014 a yega 100.000 persona. Ret Karibense a kòmbersá ku Hugo Clarinda di CTB, i turistanan Maydeline Chirino i Nelson Castillo, kende a kompartí nan eksperensiá durante nan bishitá na Kòrsou.

Hugo Clarina den kombersashon ku Deya Mensche

 

Según Hugo Clarinda, direktor interino di Curaçao Tourist Bureau (CTB), tin dos tipo di turista benesolano ku ta bishitá Kòrsou, esun riku i esun di klase medio. “Esun riku tin su kuentanan den eksterior i no mester di gobièrnu pa atkerí dòler”, ela splika. “E merkado benesolano ta unu hopi volátil, i nos no por stèns riba dje”, ela splika. “Mester sigui invertí den esnan europeo, merikano, brazilero, i awó ku a kita e visa, Colombia”, según Clarinda.

“E medidanan ku Kòrsou por tuma, ta pa enfoká riba e otro merkadonan, ya ku no por influensia e situashon na Venezuela”, ela konkluí. CTB tin hopi aña di eksperensiá ku turismo benesolano, i tòg ta keda optimista. Clarinda ta antisipá ku pa motibu di medidanan nobo, lo bini un kaida drástiko den e montante di turista, pero ta premirá ku despues di dos a tres luna, esaki lo stabilisá bèk.

E turistanan si no tabata asina optimista i ta teme ku e medidanan lo mata e fluho di turista pa Kòrsou. “Mi kièr a konosé Kòrsou komo turista, pero 1500 dòler pa konosé un pais ta limita bo hopi”, Maydeline Chirino a splika. “E medidanan ta resien, aproksimadamente aprel nan a keda introdusí i ta pone ku nos ta preferá di no biaha pasobra e ta un molèster”, ela splika.
Según e turistanan, gobièrnu di Venezuela no ta teniendo kuenta ku e sèn ku e ta aloká, hopi biaha no ta yega i ta limita kiko bo por hasí durante e biahe. Ku e sèn, e turista tin di paga kuminda, hospedaje, transporte i demas gastu, i hopi biaha ta biaha na grupo pa asina tene e gastunan mas abou posibel.

Chirino ta atmití ku sierto turista a abusa di e situashon i ta bende dòler riba merkado pretu na Venezuela. “Nos ta paga pa e pekadonan, na lugá ku gobièrnu ta hasí su trabou di kontrol. Awó e situashon ta unu di poder”, ela deklará. Nan ta konvensí ku e situashon por keda solushoná pa gobièrnu benesolano, “pero pa aworakí ta mas difísil so e situashon lo bira, paso awó tur hende mester haña un kuenta di e banko nashonal pa asina e haña un credit card di banko”, nan a splika.

Nelson Castillo ta un mener di skol, a opta pa bishitá nos isla pa promé biaha, pasobra e pasashi ta mas barata i mas fásil pa haña. “Ta hopi difísil i kostoso pa haña un ticket pa otro kaminda”, ela atmití. “Ku e limitashon finansiero, ela bira un sakrifisio pa bai di biahe”, ela splika. “Ora bo yegá Venezuela bèk, bo tin di hasí un deklarashon di tur kos ku bo a kumpra i bo motibu di biahe.”

A pesar di tur kos, turistanan Chirino i Castillo su eksperensiá tabata unu plasentero i a keda gaba kon amabel i amikal e paisanonan a trata nan. “Lo mi rekomenda otro persona bin bishitá Kòrsou, e ta hopi bunita”, Castillo finalisá.

Outor Deya Mensche