Lider di koalishon Clyde van Putten no ta kontentu despues di su bishita na Cft – potrèt: Anneke Polak
WILLEMSTAD – Suspirando lider di koalishon Clyde van Putten (PLP) di Sint Eustatius ta sali e edifisio di Cft na Willemstad. “No bon” e ta bisa na un manera iritá ora puntr’é kon e deliberashon a bai. “Nan a skohe kaba.”
For di awor Sint Eustatius mester sigui e konsehonan di College financieel toezicht (Cft) tokante presupuesto i maneho finansiero. Asina minister Ronald Plasterk di Relashonnan den Reino a bisa Statia awe. “Pa evitá ku e presupuesto tanten bira mas malu for di awor no por tuma kompromiso finansiero nobo mas.”
Temporada kolonial
Na 2011 i 2012 tambe esaki tabata e kaso, pero awor e reakshon lo ta otro, Van Putten ta bisa. Ë hendenan di Statia lo no aseptá esaki.” E ta papia trankilamente pero ku palabra bon kla. “Hulanda no ta komprondé ku e temporada kolonial a pasa, nos hendenan a emansipá. Mientras tantu ku ami ta e lider riba e isla aki, nos lo no aseptá esaki i nos ta dispuesto di bai den lo mas ekstremo ku nos por. Kiko esei ke men? Nos lo bringa pa e kurasonnan i e alma di nos pais. Si mester drama sanger den kayanan di Statia t’asina mester ta.”
No ta kla kiko Van Putten ke men konkretamente. “Tempu lo siña nos.” Entretantu el a duna diputado Astrid Mc.Kenzie ordu pa bini Statia bèk for di Hulanda kaminda e tabata presensiá e siman di Hulanda Caribense. Van Putten mes lo a keda Kòrsou te djadumingu pero awor e ta kontemplá di bai bèk mas promé. “Lo no ta fásil pa trese e mensahe aki kas.”
Sekretaro di Cft Cees van Nieuwamerongen no ke bisa nada di e deliberashon ku e lider di koalishon di Sint Eustatius. “Awor nos lo warda e instrukshonnan d presupuesto adaptá pa 2015. E último temporada nos a manda diferente konseho pa Sint Estatius i nos a kompartí nos prekupashonnan. A duna e presupuesto un konseho negativo, esaki tabata algun luna pasá. Te awe nos no a risibí un presupuesto nobo.”
“Hulandes blanku”
E polítiko awor ta indiká ku e deadline pa un presupuesto adaptá ta bini muchu trempan. “Na luga di bini ku un supervishon delantá, lo tabata mihó pa eksaminá nos presupuesto i koperá ku gobièrnu. Pero mientras tantu Democratic Party di Koos Sneek – un hulandes blanku – no ta den koalishon bo ta haña bo ku e kosnan aki. E supervishon delantá no ta solamente polítiko sino rasista tambe. E sintimentu aki ta reina riba e isla. Hulanda no ta konfia e polítikonan lokal.”
For di 10-10-’10, e fecha ku Sint Eustatius a bira munisipio ekstraordinaro di Hulanda, segun Van Putten a pasa masha hopi belasten i areglo èkstra. “Pero plaka èkstra pa drecha e isla sosialmente i ekonómikamente nan no ta duna. Bo ta haña ku ta straño ku e défisit di presupuesto di e aña aki ta subi bai entre dos pa kuater mion dòler?”
Défisit ta oumentá
Van Nieuwamerongen ta enfatisá ku e défisit no a aparasé sin mas. “Na mitar di 2014 e promé señalnan di akto ilísito a drenta. Asina a tuma kompromiso ku no tabatin base den e presupuesto, manera nombramentu di trahadó èkstra ku no tabata presupuestá. E tempu ei kaba nos a indká ku algu mester kambia pa evitá supervishon delantá. Mi ta spera pa Statia ku e défisit no ta subi bai te kuater mion dòler.”
Outor Anneke Polak