Inspektor Gershi Rodrigues Pereira den su ofisina – potrèt: Leoni Leidel-Schenk
WILLEMSTAD – For di otro luna e operashonnan pa hasi stoma mas chikí na Hòspital Sint Elisabeth (Sehos) lo kuminsá atrobe. Asina kabes i dosente di e sekshon di siruhia Patrick Fa Si Oen, ku alabes ta kordinadó di e programa bariatriko, ta bisa.
“Aktualmente e pashèntnan ta den e trayekto preliminar i ta ferwagt ku e pashèntnan ku ta bini na remarke pa un operashon despues di pasa de e trayekto preliminar, den bon deliberashon ku inspekshon, for di e di tres kuartal di e aña aki por operá”, segun Fa Si Oen.
Segun e siruhano lo ehekutá e programa ku un tim di internista, dietista, sikólogo, siruhano, anestesista, gastro-enterólogo i enfermero.
Fa Si Oen a operá un pashènt djis despues ku a kita e paro riba operashon pa hasi stoma mas chikí, segun e médiko durante un “kongreso kirúrgiko den un seshon live ku imagen live streaming pa un públiko di kongreso eksperto, den kuadro di enseñansa regional.”
Na februari 2013 inspekshon a stòp e operashonnan pa hasi stoma mas chikí despues di vários kaso di morto. Na yanüari di 2014 e siruhano Patrick Fa Si Oen a boga pa kuminsá atrobe ku e programa despues ku a hasi un investigashon interno. No a publiká e investigashon pasobra e ta kontené dato tokante pashènt.
Garantia di kalidat
Segun Rodrigues Pereira e rapòrt ta trata solamente di un investigashon sientífiko di sirugia bariatriko. “Esei ta diferente di un investigashon pa garantisá kalidat. Bo no por hasi esei internamente. Esei ta manera si un karnisero kùr su mes karni. Mi a wak e rapòrt i mi a bisa ku e garantia di kalidat no ta sufisiente ainda. E di dos paso ta e plan di maneho. Ainda nos ta den e fase ei. Den e sekshon di siruhania ta tuma medidanan interno tambe pa garantisá kalidat. Den mi opinion por hasi esaki ku mas énfasis, tambe si ta trata di midimentu di kalidat.”
A nombra Rodrigues Pereira pa sinku aña i aktualmente e tin ocho luna ta traha komo inspektor. El a heredá un inspekshon di Salubridat ku hopi falta di personal. “Tin keho ku a keda sin trata hopi tempu kaba, asta keho di fin di 2010. Esaki ta e sobránan di tur e añanan ku e kontinuidat di e inspekshon a laga hopi di deseá. Ku eksepshon di dos keho a kaba di trata tur keho, 35 fail te 2014. Tin un òf dos keho ku ainda nos mester disidí si nos mes ta sigui ku nan òf si nan mester bai kolegio disiplinario médiko.”
‘High profile’
Tin dos keho ‘high profile’ kaminda esnan interesá ainda ta warda e konklushon: morto di Julio Martina despues di un operashon pa hasi stoma mas chikí i e operashon di galblaas ku a faya di Lisette van Tatenhove. Inspektor no por bisa si ta trata di e dos kasonan aki. Van Tatenhove i Julio Martina su yu hòmber Raylison dos be kaba a manda un karta urgente pa minister di Salubridat Ben Whiteman tokante nan kehonan, pero te awe nan no a haña kontesta.
Rodrigues Pereira ta bisa ku e falta di personal na inspekshon no ta molesti’é, kaminda aktualmente no tin inspektor general tampoko. “Si bo puntra mi ku, ku e kantidat di hende ku inspekshon tin i ku e velosidat ku por hèndel na Kòrsou, por hasi sufisiente den interes di salubridat públiko, mi ta bisa: si. No tin un inspektor general, pero su tarea ta mas di kordiná. Te awor mi no ta haña nesesario tampoko pa nombra un inspektor athunto.”
Fa Si Oen ta laga sa ku dokter Berry, kontra kende ainda tin un keho ta kore pasobra un pashènt a fayesé despues di un operashon pa hasi stoma mas chikí, a indiká ku e no ke ta envolví mas den siruhia bariatriko i ku e no a ehekuta operashon bariatriko mas.
Outor Leoni Leidel-Schenk