A tira Jais Juliana mata sanger friu e anochi di 15 di yüli – potrèt: José de Bruin
WILLEMSTAD – Awe mèrdia a trata e kaso kontra èks polis Xavier de Windt, kende a keda akusá di ta kómplise den e dòbel asesinato sensashonal ku a tumá lugá 15 di yüli ultimo na aeropuerto Hato. De Windt lo a duna e tep na Basilia, un supuesta miembro di NLS, ken na su lugá a alerta e sospechoso Martis, ki dia Juliana i Arnhem lo a yega Kòrsou.
De Windt a rekonosé ku ela risibí 35 mil florin pa su informashon, pero a ninga tur enbolbimientu den e asesinatonan. De Windt a deklará kontinuamente ku ela ser usa dor di Basilia, kual tabata na altura di su situashon finansiero. “Mi no ta partí di niun organisashon kriminal, i mí no a yuda plania nada. Mi bobedat a pone mí den e situashon akí”, ela deklará.
Deya Mensche ta papia ku abogado Salina Helder
Tambe hues van Dam van Isselt a kuestioná si de Windt realmente no tabata sa ku (NLS) tabata buska Jais pa likidá, ya ku via di su trabou e tabata dispone di informashon. Tambe fiskal Hato – Willems a tilda de Windt di a usa su funshon komo polis pa saka informashon serka Candelaria, e funshonario di VDC, i tabata ping esaki kasi tur siman pa sa si tabatin algun desaroyo.
Según Candelaria, de Windt kièr a sa spesífikamente si por a bin kambio den e buelo i a keda puntra si e buelo ta na ora. Fiskal a ilustra kon den e korespondensia entre e funshonario i de Windt, unda esaki a hasí deklarashonnan inkriminatorio manera “un kriminal menos” i “nan lo haña otro”, insinuando ku t’e a suministra e informashon.
Hues van Dam van Isselt no por a komprondé dikon de Windt a aseptá e 35 mil florin di Basilia si e no tabata kómplise. “M’a tuma e sèn, pero mi no a hasí pregunta paso mi tabatin miedu”, ela deklará. Si Ministerio Públiko ta rekonosé ku de Windt a kooperá i a atmití ku dia 29 di mart último, ela purba bende dos portofon, e asina yama Chuchubi, na un reportero pa 5 mil florin.
Según deklarashon di Reclassering, e sikiater a deklará de Windt kompetente, pero ta teme ku e chens pa ripitishon ta haltu, paso e akusado lo tin amistat ku personanan ku vínkulo den kriminalidat.
Na su turno, de Windt a ninga esaki kategórikamente, “mi bida ta drai rònt di mi kas i trabou”. Según abogado Salina Helder, e rapòrt sikológiko no a duna un relato kompleto, i a pidi pa hues ordena un evaluashon mas ekstenso di e akusado su personalidat i di e situashon mitigante.
Fiskal ta haña e akusado kulpabel di soborno i a tacha integridat di su funshon i esun di Kuerpo Polisial. “Ministerio Públiko ta pidi un kastigu di prizòn di seis aña i pa e no ta polis mas pa dies aña”.
De Windt ta lamenta su aktonan, pero ta pidi pa hues no kastig’é pa un krímen ku según e, e no tabatin nada di haber ku n’e. “Mi sirkunstansianan finansiero a hasími desespera, mi no ta un hende ku ta hasí malu, mi ta un hòmber di famia”, e akusado a finalisá emoshonalmente.
Hues van Dam van Isselt lo dikta sentensia dia 26 di yüni próksimo.
Outor Deya Mensche