Minister Dennis Richardson i minister Marcel Gumbs (dr) – potrèt di archivo: Today / Hilbert Haar
PHILIPSBURG – Tempunan kandente ta yegando den polítika di Sint Maarten. Djaluna tin un debate riba agènda tokante lantamentu di un kámara di integridat. Ta ferwagt ku e miembro Frans Richardson (USp) lo entregá un moshon di deskonfiansa kontra minister di Hustisia Dennis Richardson. Si aseptá e moshon aki, henter gabinete lo bai kas.
E inisiativa pa e moshon di deskonfiansa kontra Richardson pa hopi tempu tabata parse sin perspektiva, pasobra Frans Richardson, ku ta sostené e koalishon, tin un asiento so. Koalishon tin dies di e diessinku asientonan – shete di UP, dos independiente (Cornelius de Weever i Leona Marlin Romeo) i esun di USp.
Señal serio
Pa haña mayoria Richardson su moshon mester di sosten di e sinku miembronan di oposishon i por lo ménos dos miembro di koalishon. E fin di siman aki e promé señalnan serio a kuminsá drenta ku e moshon lo por a haña sosten di nuebe parlamentario. E miembro di UP Matser ya pa algun tempu no ta bon ku su partido i e lider di frakshon di UP Franklin Meyers durante un tratamentu anterior di e legislashon di e kámara di integridat a hiba un oposishon ekstremo.
Ainda no ta kla ta ken lo tin e di nuebe voto pa e moshon. E kandidatonan mas opvio ta Leona Martin-Romeo, ku despues di elekshon a sali for di USp i ta sostené koalishon komo independiente i Tamara Leonard di UP-MP.
Lider di UP Theo Heyliger – potrèt: Today
Lider di partido Theo Heyliger e fin di siman aki no ker a duna un splikashon di e posibel desaroyo ku por tira e pais den un krísis polítiko profundo. Richardson – ku sosten di henter gabinete – a kumbiní ku minister di Relashonnan den Reino Ronald Plasterk ku gobernador mester ratifiká e legislashon pa e kámara di integridat promé ku fin di e luna aki.
Deadline
Si e krísis polítiko menasante manifestá su mes, tratamentu di e proposishon di lei lo para i lo no logra alkansá e deadline aki. Ta kasi sigur ku e ora ei reino lo bolbe bini ku un Algemene Maatregel van Rijksbestuur pa fòrsa instalashon di un kámara di integridat.
Algun miembro di parlamento, entre nan Frans Richardson, ta sinti nan mes eliminá pa e akuerdo ku Plasterk, ounke ku na final ta parlamento ta disidí si e akuerdo aki ta bira un lei si òf nò. Na aprel pa promé bes parlamento a trata un proposishon di lei pa lanta un kámara di integridat. UP i e parlamentario Marlin-Romeo i De Weever a firma e akuerdo di gobernashon kaminda ta stipulá lantamentu di e instituto aki.
Método di Gestapo
Lider di e partido UP, Theo Heyliger tin problema ku e konsepto, pero e ta indiká ku e no por vota kontra un proposishon asina. Su kompañero den frakshon Silvo Matser si a kibra e proposishon na wèrki i asta a papia di “método di Gestapo” ku e no por biba kuné. E resistensia di mas fuerte no a bini di oposishon sino di e lider di frakshon Franklin Meyers ku a deklará ku e ta “preferá di muri pará ku biba na rudia.”
De Weever a duda e integridat di e outornan di e rapòrt di integridat di PricewaterhouseCoopers. Miembro di oposishon Christophe Enmanuel na aprel a bisa ku ta mihó pa “pèrsigui indivíduo ku ta responsabel pa daño na integridat ku pa kue un kámara di integridat tapa henter e pais kuné manera ku un deken.”
Lider di UP Heyliger na aprel a puntra: “Kiko ta pasa si nos no aprobá e lei aki?” Prome minister Marcel Gumbs, ku djaluna ta defendé e proposishon di lei den parlamento, mester tin un kontesta riba e pregunta aki.
Outor Hilbert Haar