Sissy Dulfer ta un di e demandantenan den e kaso sumario kontra gobièrnu | Potrèt: Dick Drayer
WILLEMSTAD – Gobièrnu, gruponan di medio ambiente i habitante ta anda huntu kontra e molèster di sushamentu di Isla i BOO, e sentral di energia riba e tereno di e refineria.
Esaki ta e resultado di e deliberashon ku wes Peter van Schendel a eksihí durante e kaso sumario ku a tene djabièrnè. Loke no a logra niun hende den 15 aña , korte si a logra: laga e partidonan papia ku otro.
Habitante ku ta biba bou di huma di Isla, djabièrnè den e promé seshon di nan kaso sumario kontra gobièrnu a haña oportunidat amplio pa presentá nan ‘emergensia’. Asta tribuna públiko por a testiguá. I esaki tabata yen yen di hende ku ta mas ku hartá di e sushamentu. No solamente pa motibu di e insiguridat ku nan t’aden tokante e naturalesa i orígen di e sushedat koló bèrdè. Nan ta puntra tambe unda nan por entregá e resibu di e limpiesa ku mester hasi tur siman.
Asombrá
Wes Van Schendel a dediká e dos oranan kompleto pa urgi gobièrnu di drenta kombersashon ku e demandantenan pa investigá e puiru bèrdè i otro sushedat den e barionan bou di e huma. Wes tabata asombrá ku gobièrnu no ta anda di su mes boluntat ku esnan konserní den e kaso aki, inkluso Schoon Milieu Op Curaçao (SMOC) i Clean Air Everywhere.
Na fin di e seshon tabatin un apertura pa deliberashon i a duna e partidonan ordu pa sinta huntu e dia despues. Wes a splika bon kla ku e resultado di e deliberashon mester duna e demandantenan espasio pa laga hasi e investigashon aselerá. Esta: investigashon i resultado den dos luna ku un pregunta di investigashon i un ekfekto aseptabel pa e habitantenan.
Akuerdo
E promé kombersashon entretantu a tuma lugá i a bai na un manero ku tur partido tabata satisfecho. Minister Ben Whiteman (Salubridat) tambe a duna su fiat entretantu pa sigui e kaminda aki. Ta presentá e resultado di e deliberashon na wes dia 8 di yüli. Te e dia ei gobièrnu i demandantenan lo kombersá pa por papia tokante tur e otro punto nan tambe. Esaki lo nifiká ku gobièrnu ta hasi e raportahenan disponibel i lo informá e habitantenan di e próksimo pasonan.
Si esaki logra lo bini un akuerdo di stipulashon ku lo inkorporá den e sentensia. I esei segun wes Peter van Schendel ta mihó ku atrobe un forsegeo hurídiko dies aña largu.
Outor Dick Drayer