Minister di Asuntunan Eksterior Bert Koenders
DEN HAAG – Hulanda mester tuma medida kontra peligernanpa Aruba Boneiru i Kòrsou pa motibu di e situashon di tenshon na Venezuela. Pései awe den Tweede Kamer na Den Haag a entregá un kantidat di moshon pa minister di Asuntunan Eksterior Bert Koenders (PvdA).
E parlamentarionan Han ten Broeke (VVD) i Raymond Knops (CDA) a spanta di e palabranan menasante di presidente venesolano Nicolas Maduro. Mas promé e aña aki e presidente a bisa ku su pais a hala su ‘zona di defensa’, mas leu ku Aruba, Boneiru i Kòrsou. Awor e parlamentarionan ta apelá na Koenders pa tuma ‘medidanan trankilisante’pa protehá e integridat di e fronteranan di Reino.
E minister ta haña e proposishon di Ten Broeke i Knops un ‘moshon difikultoso’. Koenders: “Nos ta vigilante i alèrt. Naturalmente nos ta vigilá e situashon bon.”
Refugiado
VVD i CDA tin miedu tambe ku e Islanan Abou lo haña nan ta prosesá fluhonan grandi di refugiado. E partidonan ke pa Koenders insistí serka gobièrnonan di Aruba i Kòrsou pa reforsá e vigilansha riba imigrashon for di Venezuela. Koenders ta bisa ku e ta hasiendo esaki kaba. Segun e, e kantidat di refugiado ta marginal.
Segun Raymond Knops (CDA) e korant di Kòrsou Extra tin un rapòrt sekreto di ministerio di Asuntunan Eksterior. Eiden tin pará entre otro ku Hulanda tá premirá un fluho grandi di refugiado venesolano. Koenders: “Mi no tin nada di skonde i mi no tin un idea ta kua rapòrt esei por ta.”
Liberashon di lidernan di oposishon
Segun Sjoerd Sjoerdsma (D66) Hulanda mester insistí tambe pa liberá demonstrante i lidernan di oposishon ku ta será. E no ta kere den un huisio honesto den e pais sosialista. Koenders a papia ku e visepresidente venesolano i e embahadora venesolano na Hulanda. Den e kombersashonnan ei e no a pidi liberashon, sino el a insistí riba un huisio honesto pa e lidernan di oposishon ku ta será. “Nos lo wak e hurisdikshon krítikamente.”
Otro siman Tweede Kamer ta vota riba e proposishonnan ku a entregá.
Outor Pieter Hofmann