Shop stuart di CBV Nuka Cathalina | potrèt Deya Mensche
WILLEMSTAD – Algun dia mas falta pa klínika Taams, e vishon di e legendario médiko Jan Taams sr., lo pasa por olvido. Djamars awó, ofisialmente hospital Advent lo ta e doño nobo, despues di a kumpra e klínika na findishi pa 14 mion florin. 142 trahadó lo keda sin trabou, despues ku minister Whiteman a ninga pa salbarguardia e klínika. Según shop stuart di CBV, Nuka Cathalina, e trahadónan di Taams ta hopi tristu i abatí, paso nan semper a karga un speransa ku un invershonista lo a sali pa salba e klínika.
Según Johnsel Diaoen, presidente di sindikato CBV, e sesantia lo keda paga, pero tur hende mester solisitá di nobo pa bin na remarke pa traha na Advent 2. Lo mester tabatin un reunion ku Advent djahueps atardí, pero esaki a keda kanselá i awe djabièrnè tabatin un reunion ku miembronan di sindikato, unda lo splika e konsekuensia nan di e benta, ya ku no lo opera e klínika mas.
“Minister tabata klaro fo’i prinsipio kiko ta gobièrnu su posishon riba e futuro di klínika”, Earl Esseboom, direktor médiko di klínika Taams, a splika. “E deklarashon di bankarota tabata un atkishon hostil di partí di gobièrnu, unda a indiká fo’i prinsipio ku gobièrnu ke sentralisá kuido médiko i no lo tin luga pa klínikanan priva manera Taams”, ela kontinuá.
“Tabatin varios palabrashon ku gobièrnu, unda lo a adresa e problema ku tarifa, kual no a keda indeksá pa 15 aña i tabata afektá e fluho di sèn”, e gerente di Taams a splika. Según Esseboom, gerensia a bini ku un plan empresarial ku tabata viable, pero esaki a keda pone un banda, pasobra a lanta un fundashon promé ku e resultado di e investigashon di Berenschot a sali.
“Berenschot ta un makina di mentira i nos a entrega un keho ofisial na e komishon laboral ku nan ta miembro di dje, pa wak si e manera ku e konsultorio a trata nos ta korekto”, ela kontinuá. “Nos mes, sin yudansa di gobièrnu, a buska invershonista pa skapa e klínika, pero a enkontrá resistensia tur kaminda. Tur inversionista ku tabata interesa pa hinka sèn den e klínika tabata warda riba un señal di gobièrnu riba e ahuste di tarifa, pero esaki nunka a bini”, Esseboom a splika.
E gerente nobo a indiká ku nan lo sigui ku solamente e departamento di rayo X i e parsialmente e laboratorio, kual ta bira un sentro di prek. Según Esseboom, Advent a anunsiá un trayektoria di sinku etapa pa drecha tur kos i e promé etapa lo finalisá na Novèmber. Según Diaoen, CBV a intermedia fo’i Sèptèmber di aña pasa, ora kièr a deklará e klínika fayit i a urgí gerensia i gobièrnu pa salbarguardia e kuponan di trabou. Tambe CBV a apela na van der Laarschot, e kurator di Taams, pa pidi un ekstenshon te dia 30 di yüni ora ta pidi bankarota, pa asina trahadónan por kobra fin di luna.
Según Diaoen, te ku djamars último, ora CBV tabata serka minister Ben Whiteman, ainda Advent no a entrega niun petishon di operashon, i ku e bankarota tur pèrmit a kaduká. “Pues no tin kontinuidat i Advent a indiká ku nan ta bezig internamente”, Diaoen a splika. “Si gobièrnu realmente tabatin e trahadónan su bienestar na pechu, minister Whiteman por a eksedé un pèrmit operashonal te dia e hospital nobo bin kla, pero esaki no a pasa”, e presidente di sindikato a deklará.
Ret Karibense a aserka hospital Advent na varios okashon pa un deklarashon, pero esaki no tabata disponibel pa komentario.
Outor Deya Mensche