Wardakosta a detené un boto ku imigrante ilegal di Venezuela – potrèt: Wardakosta
WILLEMSTAD – E situashon ekonómiko angustioso den pais bisiña Venezuela ta pone mas i mas hende hui pa e islanan. Pa Kòrsou pero espesialmente pa Aruba. “Nan ta bini ku hopi hende den boto chikí sin medida di seguridat.”
Kombatí imigrashon ilegal tambe ta un di e tareanan di wardakosta, asina bosero Roderick Gouverneur ta bisa. “Pa loke ta e situashon na Venezuela nos ta trata di pone mas patruya, pasobra nos ta ripará ku tin mas hende ku ta purba yega tera ilegalmente.”
Minister di Hustisia Nelson Navarro tambe a ripará ku tin un fluho. Via laman, pero tambe riba tera. Venesolano ta drenta ku visa di turista pero nan no ta bai bèk. Aktualmente ta rastreá e venesolanonan aki i ta saka nan, asina e ta laga sa.
Esfuerso èkstra
Navarro ta komprondé e gritu di Tweede Kamer pa esfuerso èkstra di marina i ta indiká ku esaki ta e intenshon tambe. Bosero Maartje van der Maas di Defensa di Área Karibense ta bisa ku te ainda ta warda un señal di polítika pa pone mas personal traha. E yegada di e supmarino Bruinvis, e barku di stashon Zr. Ms. Van Amstel i e barku di mas grandi di marina, Karel Doorman, segun e no tin relashon ku e situashon na e pais bisiña Venezuela ku a bira mas malu.
Por lo pronto marina ta warda un señal di polítika pa yuda kombatí imigrante ilegal di Venezuela – potrèt: Anneke Polak
Mientrastantu wardakosta ta traha un tiki mas duru. “E imigrantenan ilegal ta bini ku yate, ku barku di fruta i ku boto masha krekeché mes. Na Aruba nos tin wowo èkstra riba laman pasobra ta un biahe di barku di 1 ora i mei so, ke men por alkans’é mas fasil. Algun luna pasá un kapitan a tira hende na laman pega ku kosta, i dos hòmber a hoga.”
Outor Anneke Polak